20 رکنی نئی وفاقی کابینہ پیر کو حلف اٹھائے گی


اسلام آباد: نومنتخب وزیراعظم عمران خان نے 20 رکنی کابینہ کی منظوری دے دی ہے۔

پاکستان تحریک انصاف کے مرکزی ترجمان فواد چوہدری نے سوشل میڈیا کی سائٹ پر اپنے ٹویٹ میں کہا ہے کہ وزیراعظم عمران خان نے 20 رکنی کابینہ کی منظوری دے دی ہے، کابینہ میں 15 وفاقی وزرا اور 5 مشیر شامل ہیں۔

فواد چوہدری نے اپنے ٹویٹ میں بتایا کہ  وزرا پیر کی صبح ایوان صدر میں اپنے عہدے کا حلف لیں گے۔

فواد چوہدری کے ٹویٹ کے مطابق سینیٹر فروغ  نسیم کو قانون اور انصاف کی وزارت دی جا رہی ہے، شیریں مزاری کو وزارت انسانی حقوق، فواد احمد کو اطلاعات و نشریات، اسد عمر خزانہ، شیخ رشید احمد کو ریلوے، پرویز خٹک کو دفاع  اور نورالحق قادری کو وزارت مذہبی امور سونپی جا رہی ہے۔

اس کے علاوہ غلام سرور خان کو پیٹرولیم، طارق بشیر چیمہ کو ریاستی اور سرحدی امور، زبیدہ جلال کو دفاعی پیداوار، عامر محمود کیانی کو صحت، شاہ محمود قریشی کو وزارت خارجہ، شفقت محمود کو وفاقی تعلیم اور پیشہ ورانہ تربیت، فہمیدہ مرزا کو بین الصوبائی رابطہ اور خالد مقبول صدیقی کو انفارمیشن ٹیکنالوجی کے قلمدان سونپے جائیں گے۔

نئی وفاقی  کابینہ میں متحدہ قومی موومنٹ (ایم کیوایم)  کے 2  وزرا شامل  کیے گئے ہیں جبکہ  ق لیگ، گرینڈ ڈیمو کریٹک الائنس (جی ڈی اے) اور عوامی  مسلم لیگ کے حصے میں ایک ایک  وزارت آئی ہے،  بلوچستان نیشنل پارٹی (بی این پی) مینگل  کو کوئی وزارت نہیں دی گئی۔

وفاقی کابینہ میں پانچ مشیر بھی شامل کیے گئے ہیں، اسٹیٹ بینک آف پاکستان کے سابق گورنر ڈاکٹرعشرت حسین مشیر ادارہ جاتی اصلاحات ہوں گے جبکہ امین اسلم  کو مشیرماحولیاتی تبدیلی، محمد شہزاد ارباب کو مشیراسٹیبلشمنٹ ڈویژن، عبدالرزاق داؤد کو مشیر تجارت و ٹیکسٹائل اور ظہیر الدین بابر کو مشیر برائے پارلیمانی امور مقرر کیا گیا ہے۔


متعلقہ خبریں