اسلام آباد: پاکستان تحریک انصاف کے ترجمان فواد چوہدری نے کہا ہے کہ الیکشن کے بعد انتقال اقتدار کو انتہائی سنجیدگی سے لینا چاہیے ورنہ تعطل اور تاخیر سے انتخابات پر شکوک و شبہات جنم لیں گے۔
الیکشن کمیشن کی جانب سے کامیابی کے نوٹیفیکیشن روکنے کے معاملے پر بات کرتے ہوئے فواد چوہدری نے کہا کہ انتقال اقتدار میں تعطل سے ملک اور عوام براہ راست متاثر ہوتے ہیں۔
انہوں نے کہا کہ معاشی اور پالیسی سے متعلق مسائل مزید پیچیدہ ہونے کے امکانات ہیں اور یہ سب مسائل براہ راست ملک پر شدت سے اثر انداز ہو سکتے ہیں۔
انہوں نے چیف جسٹس سے استدعا کی کہ وہ الیکشن کمیشن اور ماتحت عدالتوں کی جانب سے پیدا کیے جانے والے تعطل کا خود جائزہ لیں۔
الیکشن کمیشن پاکستان نے مختلف وجوہات کی بنا پر26 قومی و صوبائی اسمبلی کے حلقوں کے نوٹیفیکیشن روک لیے ہیں۔
پی ٹی آئی کے چیئرمین عمران خان کا تین حلقوں سے مشروط نوٹیفیکیشن جاری کیا گیا ہے، ایک حلقہ سے حکم امتناعی اور دوسرے میں ضابطہ اخلاق کی خلاف ورزی کی وجہ سے نوٹیفیکیشن جاری نہیں کیا گیا۔