خیبر پختونخوا کے دارالحکومت پشاور کی دیر کالونی میں نجی اسکول کی چھت گرنے کے افسوسناک واقعے جس میں 32 بچے اور 2 خاتون اساتذہ جاں بحق ہوگئی تھیں، کے بعد صوبائی حکومت نے نجی اسکولوں کی عمارتوں کی حفاظت یقینی بنانے کے لیے صوبے بھر میں حفاظتی معائنے کا فیصلہ کرتے ہوئے ضلعی سطح پر انکوائری کمیٹیاں تشکیل دے دی ہیں۔
محکمہ ابتدائی و ثانوی تعلیم کی جانب سے نوٹیفکیشن جاری کر دیا گیا ہے، جس کے تحت کمیٹیاں نجی اسکولوں کی عمارتوں کا معائنہ کرکے ان کی تعمیراتی حالت اور حفاظتی انتظامات کا جائزہ لیں گی۔
حکومتی اقدام کے تحت اسکولوں کی چھتوں، دیواروں، بنیادوں اور عمارت کے دیگر تعمیراتی حصوں کی جانچ کی جائے گی تاکہ کسی بھی ممکنہ خطرے کی بروقت نشاندہی کی جا سکے، کمیٹیاں خطرناک عمارتوں کی نشاندہی کے ساتھ مرمت اور انہیں مضبوط بنانے کے لیے بھی تجاویز پیش کریں گی۔
مزید پڑھیں
نوٹیفکیشن کے مطابق کمیٹیوں کو ہدایت کی گئی ہے کہ وہ اجرا کے تین دن کے اندر اپنی تفصیلی رپورٹ اور اصلاحی سفارشات محکمہ تعلیم کو پیش کریں۔ محکمہ تعلیم نے متعلقہ اداروں کو نجی اسکولوں کی فہرستیں فراہم کرنے اور معائنے کے عمل میں تعاون کرنے کی ہدایات بھی جاری کر دی ہیں۔
پشاور میں اسکول کی چھت گرنے کا واقعہ
خیبر پختونخوا حکومت کا یہ اقدام پشاور کے علاقے دیر کالونی میں تین منزلہ نجی اسکول کی چھت گرنے کے المناک واقعے کے بعد سامنے آیا ہے۔ آج صبح پیش آنے والے اس حادثے میں 32 بچے اور 2 خاتون ٹیچرز جاں بحق ہوئیں۔
حکام کے مطابق نجی اسکول کی چھتیں کچی بنی ہوئی تھیں جبکہ حادثے کے وقت اسکول میں 110 بچے موجود تھے۔ جاں بحق ہونے والے بچوں کی عمریں 4 سال سے 14 سال کے درمیان ہیں۔
واقعے کے بعد اسکول کی عمارت کی تعمیراتی حالت، حفاظتی انتظامات اور متعلقہ حکام کی نگرانی پر سوالات اٹھے۔ حکام نے حادثے کی وجوہات اور ذمہ دارون کا تعین کرنے کے لیے 3 رکنی کمیٹی بھی تشکیل دے دی ہے جبکہ اسکول کے مالک کو بھی پولیس نے حراست میں لے لیا۔
