سکیورٹی ذرائع کا کہنا ہے کہ خیبر پختونخوا اور بلوچستان میں سکیورٹی فورسز نے کارروائیاں کرتے ہوئے 7 دہشتگردوں کو ہلاک کر دیا۔
سکیورٹی ذرائع کے مطابق خیبر پختونخوا کے علاقے باڑہ میں عزمِ استحکام ویژن کے تحت انٹیلی جنس بیسڈ آپریشن کے دوران فتنۃ الخوارج کے 5 دہشتگرد ہلاک ہو گئے، فورسز نے دہشتگردوں کے ٹھکانوں کو مکمل طور پر تباہ کرتے ہوئے ان کے قبضے سے بھاری مقدار میں اسلحہ اور گولہ بارود بھی برآمد کر لیا۔
دوسری جانب بلوچستان کے ضلع چاغی کے علاقے نوکچہ میں سکیورٹی فورسز کے آپریشن ردالفتنہ 3 کے تحت کارروائی میں 2 دہشتگرد مارے گئے۔
سب سے زیادہ پڑھی جانے والی
دہشتگردوں کی نوکچہ میں خالی واٹر باؤزر کو آگ لگانے کی کوشش
ذرائع کے مطابق فتنۃ الہندوستان سے تعلق رکھنے والے دہشت گردوں نے نوکچہ میں ایک خالی واٹر باؤزر کو آگ لگانے کے بعد فرار ہونے کی کوشش کی، تاہم سیکیورٹی فورسز نے فوری کارروائی کرتے ہوئے 2 دہشت گردوں کو ہلاک کر دیا۔
ذرائع نے بتایا کہ دہشتگرد این 40 شاہراہ کے مختلف مقامات پر آتشزدگی کی کارروائیوں میں بھی ملوث تھے، 31 اگست کو بھی اسی نوعیت کی کارروائیوں میں ملوث 11 دہشتگرد مارے گئے تھے۔
سکیورٹی ذرائع کا کہنا ہے کہ سکیورٹی فورسز ملک سے دہشت گردی کے ناسور کے مکمل خاتمے اور پائیدار امن کے قیام کیلئے پرعزم ہیں، آخری دہشتگرد کے خاتمے تک سکیورٹی فورسز کی کارروائیاں جاری رہیں گی۔
دو دن قبل پاک فوج کے شعبہ تعلقات عامہ (آئی ایس پی آر) نے بتایا تھا کہ بلوچستان میں 96 گھنٹوں کے دوران سکیورٹی فورسز نے مختلف کارروائیوں میں 71 سے زائد دہشتگرد ہلاک کرکے بھاری مقدار میں اسلحہ اور گولہ بارود برآمد کر لیا ہے۔
سکیورٹی فورسز کی بہادری پر فخر ہے، صدر زرداری
دریں اثناء صدرمملکت آصف زرداری نے بلوچستان اور خیبر پختونخوا میں کامیاب کارروائیوں پر سکیورٹی فورسز کو خراجِ تحسین کرتے ہوئے کہا کہ قوم کو سکیورٹی فورسز اور قانون نافذ کرنے والے اہلکاروں کی بہادری پر فخر ہے۔
صدر زرداری نے اپنے بیان میں کہا کہ مؤثر حکمتِ عملی کے ذریعے دہشت گردوں کے مذموم عزائم ناکام بنایا گیا، دہشتگردی کے خاتمے تک کارروائیاں بھرپور انداز میں جاری رہیں گی۔
قومی سکیورٹی فورسز کے شانہ بشانہ کھڑی ہے، وزیراعظم
وزیراعظم شہباز شریف نے خیبر پختونخوا اور بلوچستان میں دہشتگردوں کے خلاف کامیاب آپریشنز پر سکیورٹی فورسز کو خراجِ تحسین کرتے ہوئے کہا کہ فورسز نے پیشہ ورانہ صلاحیتوں اور جرات و بہادری کا مظاہرہ کرکے دہشتگردوں کے مذموم عزائم ناکام بنائے، دہشتگردی کے خلاف جنگ میں پوری قوم اپنی بہادر سکیورٹی فورسز کے شانہ بشانہ کھڑی ہے۔
وزیراعظم کا کہنا تھا کہ ملک سے دہشت گردی کے مکمل خاتمے تک کارروائیاں جاری رہیں گی۔ پاکستان کے امن و استحکام کو نقصان پہنچانے والے عناصر کو ان کے مذموم عزائم میں کامیاب نہیں ہونے دیا جائے گا۔
وزیراعظم نے کامیاب آپریشنز میں حصہ لینے والے سکیورٹی فورسز کے افسران و جوانوں کو سلام پیش کرتے ہوئے کہا کہ پوری قوم کو اپنے بہادر سپوتوں پر فخر ہے۔
وزیر داخلہ کا سکیورٹی فورسز کو خراج تحسین
علاوہ ازیں وزیر داخلہ محسن نقوی نے خیبر پختونخوا اور بلوچستان میں کامیاب آپریشنز پر سکیورٹی فورسز کو خراج تحسین پیش کرتے ہوئے کہا ہے کہ بہادر سپوتوں نے بروقت کارروائیاں کرکے خارجیوں کے ناپاک عزائم کو ناکام بنایا۔
محسن نقوی کا کہنا تھا کہ خارجیوں اور سہولت کاروں کیخلاف کامیاب کارروائیوں کو قدر کی نگاہ سے دیکھتے ہیں، سکیورٹی فورسز کے بہادر سپوت ہمارا فخر ہیں اور قوم کو ان پر ناز ہے، قوم کی حمایت سے خارجیوں کا مکمل خاتمہ کیا جائے گا۔
