لاہور: پاکستان تحریک انصاف (پی ٹی آئی) کے رہنما حماد اظہر نے انسداد دہشت گردی کی عدالت (اے ٹی سی) میں جیل میں ناکافی سہولتوں کی شکایت کرتے ہوئے الزام عائد کیا کہ ان کے سیل میں دو سی سی ٹی وی کیمرے نصب ہیں جن کے ذریعے ان کی مسلسل نگرانی کی جاتی ہے۔ ان کا کہنا ہے کہ ان میں سے ایک کیمرے سے باتھ روم کی بھی نگرانی کی جا رہی ہے۔
پی ٹی آئی رہنما اور سابق وفاقی وزیر حماد اظہر تقریباً تین سال روپوش رہنے کے بعد 6 ستمبر 2026 کو ملتان سے گرفتار ہوئے۔ وہ 9 مئی 2023 کے واقعات سے متعلق متعدد مقدمات میں مطلوب تھے، جن میں لاہور کے جناح ہاؤس حملہ کیس اور جی او آر گیٹ حملہ کیس بھی شامل ہیں۔ پولیس نے ان کے خلاف سرور روڈ تھانے میں مقدمہ درج کیا تھا، جس میں جناح ہاؤس پر حملے اور توڑ پھوڑ کے الزامات شامل ہیں۔
حماد اظہر کی جانب سے 10 نومبر کو دائر کی گئی درخواست میں مؤقف اختیار کیا گیا ہے کہ جیل کے سیل میں دو سی سی ٹی وی کیمرے نصب ہیں، جن کی ریکارڈنگ باتھ روم اور ٹوائلٹ کی جگہوں تک بھی جاتی ہے۔ ان کے مطابق اس طرح مسلسل نگرانی سے ان کی نجی زندگی متاثر ہورہی ہے اور یہ بنیادی انسانی وقار کے بھی خلاف ہے۔
یہ بھی پڑھیں
درخواست میں استدعا کی گئی ہے کہ جیل کے سیل سے دونوں سی سی ٹی وی کیمرے فوری طور پر ہٹانے کے احکامات جاری کیے جائیں تاکہ انہیں اپنی نجی زندگی کے تحفظ کا حق حاصل ہوسکے۔
حماد اظہر نے عدالت کو بتایا کہ انہیں جیل میں کئی بنیادی سہولیات میسر نہیں ہیں۔ ان کے سیل میں نہ بیڈ موجود ہے، نہ کرسی اور نہ ہی میز کی سہولت دستیاب ہے۔
ان کا کہنا ہے کہ انہیں فرش پر سونا پڑتا ہے، تاہم اب وہ فرش پر سونے کے عادی ہوچکے ہیں۔حماد اظہر نے عدالت کو یہ بھی بتایا کہ وہ جیل میں اپنے حالات اور تجربات پر ایک کتاب لکھ رہے ہیں، جسے وہ آنے والی نسلوں کے لیے محفوظ کرنا چاہتے ہیں۔ اس مقصد کے لیے انہیں کم از کم ایک میز اور کرسی فراہم کی جائے تاکہ وہ اپنی تحریری سرگرمیاں جاری رکھ سکیں۔
عدالت میں پیش کیے گئے مؤقف کے مطابق سیل میں نصب کیمروں کی وجہ سے انہیں نہانے کے دوران بھی رازداری حاصل نہیں۔ حماد اظہر نے بتایا کہ کیمروں کی موجودگی کے باعث انہیں کپڑے پہن کر نہانا پڑتا ہے۔
بی کلاس سہولیات کے لیے بھی درخواست
پی ٹی آئی رہنما نے موجودہ جیل انتظامات کو ناکافی قرار دیتے ہوئے پاکستان پریزن رولز 1978 کے رول 242 (ii) کا حوالہ دیا ہے۔
درخواست میں استدعا کی گئی ہے کہ انہیں جیل میں بی کلاس سہولیات فراہم کی جائیں، حماد اظہر نے یہ پیشکش بھی کی ہے کہ بی کلاس کی سہولیات فراہم کرنے پر آنے والے اخراجات وہ خود برداشت کرنے کے لیے تیار ہیں۔
ان کی درخواست میں بنیادی طور پر دو مطالبات شامل ہیں:جیل کے سیل میں نصب دونوں سی سی ٹی وی کیمرے ہٹائے جائیں، خصوصاً ایسے مقامات کی نگرانی ختم کی جائے جہاں نجی زندگی متاثر ہوتی ہو۔دوسرا انہیں بی کلاس کے مطابق سہولیات فراہم کی جائیں، جن میں ضروری فرنیچر اور دیگر سہولیات شامل ہوں۔
جوڈیشل ریمانڈ میں 24 نومبر تک توسیع
10 نومبر 2026 کو حماد اظہر کو ان کا 14 روزہ جوڈیشل ریمانڈ مکمل ہونے پر لاہور کی انسداد دہشت گردی عدالت میں پیش کیا گیا۔
اس موقع پر تفتیشی افسر نے عدالت کو بتایا کہ حماد اظہر کے خلاف ضمنی تفتیشی رپورٹ تیار کی جارہی ہے اور اسے مکمل کرنے کے لیے مزید مہلت درکار ہے۔
انسداد دہشت گردی عدالت کے جج منظر علی گل نے حماد اظہر کے جوڈیشل ریمانڈ میں مزید 14 روز کی توسیع کرتے ہوئے انہیں 24 نومبر کو دوبارہ عدالت میں پیش کرنے کا حکم دیا۔
اسی عدالتی کارروائی کے دوران ان کے وکیل ابوذر سلمان نیازی کی جانب سے جیل میں بی کلاس سہولیات کی فراہمی اور سی سی ٹی وی کیمرے ہٹانے کی درخواست بھی دائر کی گئی۔
حماد اظہر کے واش روم تک سی سی ٹی وی نگرانی؟ شوکت بسرا کا ردعمل
دوسری جانب پاکستان تحریک انصاف کے رہنما شوکت بسرا نے سابق وفاقی وزیر حماد اظہر کے جیل سیل میں سی سی ٹی وی کیمروں کی تنصیب اور باتھ روم تک نگرانی کے معاملے پر سخت ردعمل کا اظہار کیا ہے۔
سماجی رابطے کی ویب سائٹ ایکس پر اپنے بیان میں شوکت بسرا نے الزام عائد کیا کہ حماد اظہر کے جیل سیل میں ایسے سی سی ٹی وی کیمرے نصب کیے گئے ہیں جن کی ریکارڈنگ واش روم تک جاتی ہے۔
These Form 47 clowns have sunk to new depths of moral bankruptcy!
Hammad Azhar, ex-Federal Minister, Barrister-at-Law & the man who spearheaded Pak’s FATF compliance efforts, has stated that CCTV cameras are installed even in his prison cell, overlooking his washroom!
What exactly are these Form 47 geniuses hoping to find in his washroom? A national security threat hiding in the toilet, or the political legitimacy they couldn’t find in the ballot boxes?
This isn’t security, it’s political perversion & an utter collapse of morality, decency & human dignity!
Power is temporary, but the shame of such moral depravity will outlive every throne & every tyrant!
@PTIofficial
@Hammad_Azhar— Shaukat Basra (@sh_basra) November 12, 2026
شوکت بسرا نے اپنی پوسٹ میں حکومت پر سخت تنقید کرتے ہوئے سوال اٹھایا کہ آخر حماد اظہر کے واش روم میں کیمرے لگا کر کیا تلاش کرنے کی کوشش کی جا رہی ہے؟
پی ٹی آئی رہنما نے اس اقدام کو سکیورٹی کے بجائے سیاسی انتقام اور انسانی وقار کے منافی قرار دیتے ہوئے کہا کہ یہ اخلاقی اقدار، شائستگی اور بنیادی انسانی احترام کے زوال کی عکاسی کرتا ہے۔
شوکت بسرا کا کہنا تھا کہ اقتدار عارضی ہوتا ہے لیکن اخلاقی پستی اور ایسے اقدامات کی شرمندگی طویل عرصے تک باقی رہتی ہے۔
