خیبر پختونخوا کے ضلع ٹانک کے علاقے وزیر آباد میں ٹریفک پولیس کی موبائل گاڑی پر فائرنگ کے نتیجے میں 3 اہلکار شہید جبکہ 2 راہ گیر زخمی ہوگئے۔
ٹانک کے ڈسٹرکٹ پولیس آفیسر (ڈی پی او) کے ترجمان نے ہم نیوز کو بتایا کہ شہید ہونے والے اہلکاروں میں کانسٹیبل سلیم شاہ، کانسٹیبل گل امین اور ڈرائیور فیاض الدین شامل ہیں۔
ضلع ٹانک کے علاقے وزیر آباد میں ٹریفک پولیس کی موبائل گاڑی پر فتنہ الخوارج کی جانب سے فائرنگ کی گئی جس میں ابتدائی اطلاعات کے مطابق حملے میں ٹریفک پولیس کے تین اہلکار شہید ہوگئے ہیں۔شہید ہونے والوں میں کانسٹیبل گل آمین، کانسٹیبل سلیم شاہ اور کانسٹیبل فیاض شامل ہی pic.twitter.com/5YXIHmdWPO
— Ghazanfar Abbas (@ghazanfarabbass) September 28, 2026
سب سے زیادہ پڑھی جانے والی
تھانہ سٹی پولیس کے مطابق فائرنگ کے بعد موٹر سائیکل سوار حملہ آور موقع سے فرار ہوگئے اور پولیس اہلکاروں کا اسلحہ بھی ساتھ لے گئے۔ واقعے کے بعد پولیس نے علاقے کو گھیرے میں لے کر ملزمان کی گرفتاری کے لیے سرچ آپریشن شروع کر دیا ہے، جبکہ واقعے کی مزید تحقیقات جاری ہیں۔
ڈی پی او کے ترجمان کے مطابق شہید پولیس اہلکاروں کی میتیں ضروری کارروائی کے لیے ڈسٹرکٹ ہیڈکوارٹر ہسپتال ٹانک منتقل کر دی گئی ہیں، جبکہ زخمی سویلینز کو بھی طبی امداد فراہم کی جا رہی ہے۔
یہ گزشتہ 10 روز کے دوران خیبر پختونخوا میں دہشت گردی کا چوتھا بڑا واقعہ ہے۔ گزشتہ روز ضلع لکی مروت میں دہشتگردوں کے حملے میں 3 افراد شہید جبکہ 3 زخمی ہوگئے تھے۔
اس سے قبل ڈیرہ اسماعیل خان میں ایک چیک پوسٹ پر مبینہ خود کش دھماکے اور فائرنگ کے نتیجے میں 12 افراد شہید جبکہ 35 زخمی ہو ئے تھے۔
18 ستمبر کو کوہاٹ کی پرانی پولیس لائنز میں نماز جمعہ کے دوران حملہ ہوا تھا جس کے نتیجے میں 21 افراد شہید اور 100 سے زائد زخمی ہوئے تھے۔
شہداء کے لواحقین کے ساتھ کھڑے ہیں، محسن نقوی
وفاقی وزیرداخلہ محسن نقوی نے ٹانک میں خوارجیوں کی جانب سے ٹریفک پولیس گاڑی پر فائرنگ کے واقعہ کی مذمت کرتے ہوئے 3 اہلکاروں کی شہادت پر اظہار افسوس کیا ہے۔
اپنے ایک بیان میں انہوں نے شہید اہلکاروں کی قربانی کو سلام پیش کرتے ہوئے کہا کہ شہداء کے لواحقین سے دلی ہمدردی ہے اور ان سے اظہار تعزیت کرتے ہیں۔
دکھ کی گھڑی میں شہداء کے لواحقین کے ساتھ کھڑے ہیں،دہشتگردی کے خلاف جنگ میں شہداء کی لازوال قربانیاں رائیگاں نہیں جائیں گی۔
گورنر خیبرپختونخوا فیصل کریم کنڈی نے بھی ٹانک میں فائرنگ کے واقعے کی مذمت کی ہے ۔
اپنے ایک بیان میں انہوں نے شہید اہلکاروں کے لواحقین سے اظہار تعزیت اور زخمی اہلکاروں کے بہترعلاج کی ہدایت کی۔
