چینی وزارت خارجہ کا کہنا ہے کہ ایرانی وزیرخارجہ عباس عراقچی کل بروز بدھ چین کا دورہ کریں گے۔
اس بات کا اعلان چینی وزارت خارجہ کے ترجمان نے ایکس پر جاری ایک پیغام میں کیا ہے۔
Minister of Foreign Affairs of Iran Seyyed Abbas Araghchi will visit China on September 16. Member of the Political Bureau of the CPC Central Committee and Minister of Foreign Affairs Wang Yi will hold talks with him.
— CHINA MFA Spokesperson 中国外交部发言人 (@MFA_China) September 15, 2026
بیان میں کہا گیا ہے کہ عباس عراقچی چینی وزیرخارجہ اور چینی کمنیونسٹ پارٹی کی سنٹرل کمیٹی کے سیاسی بیورو کے ممبر وانگ ای سےملاقات کریں گے۔
وانگ ای نے آخری بار رواں سال مئی میں بیجنگ میں عباس عراقچی سے ملاقات کی تھی، جو امریکی صدر ڈونلڈ ٹرمپ کی چینی صدر شی جن پنگ سے ملاقات سے قبل ہوئی تھی۔
بدھ کو ہونے والی ملاقات 28 فروری کو امریکا اور اسرائیل کی جانب سے ایران پر حملے شروع کیے جانے کے بعد چینی دارالحکومت میں دونوں رہنماؤں کے درمیان دوسری بالمشافہ ملاقات ہوگی۔
وانگ ای اور عباس عراقچی نے گزشتہ ہفتے کے اختتام پر بھارتی دارالحکومت نئی دہلی میں ہونے والے برکس اجلاس میں بھی شرکت کی تھی، جہاں دونوں رہنماؤں کو مختصر گفتگو کرتے ہوئے دیکھا گیا۔
امریکا اور اسرائیل نے فروری میں ایران پر بڑے پیمانے پر حملے کیے تھے، جن میں سرکاری عمارتوں، فوجی تنصیبات، میزائل انفرااسٹرکچر اور فضائی دفاعی نظام کو نشانہ بنایا گیا۔
ایران نے جواباً اسرائیل اور خطے میں موجود امریکی اڈوں پر میزائل اور ڈرون حملے کیے۔
اس کے بعد یہ تنازع خطے کے دیگر حصوں تک بھی پھیل گیا جبکہ جنگ بندی اور کشیدگی کے خاتمے کے لیے سفارتی کوششیں بھی جاری رہیں۔
