اسلام آباد: بلوچستان کے مختلف اضلاع میں سیکیورٹی فورسز نے دہشتگردوں کے خلاف کارروائیاں کرتے ہوئے 21 دہشتگردوں کو ہلاک کر دیا، جبکہ فائرنگ کے تبادلے میں 6 سیکیورٹی اہلکار شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق چاغی کے علاقے نوکچہ میں دہشتگردوں نے این 40 شاہراہ پر غیر قانونی ناکہ قائم کر رکھا تھا، جہاں وہ مسافروں سے بھتہ وصول کر کے آمدورفت میں خلل ڈالنے کی کوشش کر رہے تھے۔ سیکیورٹی فورسز نے کارروائی کرتے ہوئے 11 دہشتگردوں کو ہلاک کر دیا۔
مارے جانے والے دہشتگردوں کے قبضے سے بڑی تعداد میں اسلحہ، گولہ بارود اور دھماکا خیز مواد بھی برآمد ہوا۔
دوسری کارروائی پشین کے علاقے زیارت کراس میں کی گئی، جہاں دہشتگردوں نے کسٹمز ہاؤس پر حملے کی کوشش کی۔ تاہم سیکیورٹی فورسز کی مؤثر جوابی کارروائی میں 10 دہشتگرد ہلاک ہوئے، جبکہ فرار ہونے والے دہشتگردوں کو بھی نشانہ بنایا گیا۔
سب سے زیادہ پڑھی جانے والی
ترجمان پاک فوج کے مطابق کسٹمز ہاؤس پر حملہ دہشتگردی اور جرائم کے گٹھ جوڑ کا مظہر ہے۔ دہشتگرد کسٹمز حکام کو قانونی فرائض کی انجام دہی سے روکنا چاہتے تھے۔ فائرنگ کے تبادلے میں 2 افسران، کسٹمز کے ایک اہلکار سمیت 6 جوان شہید ہوئے۔
آئی ایس پی آر کا کہنا تھا کہ علاقے میں باقی دہشتگردوں کے خاتمے کے لیے آپریشن جاری ہے۔ شاہراہوں اور مقامی آبادی کی سلامتی یقینی بنانے کے لیے کارروائیاں جاری رہیں گی، جبکہ دہشتگردی کے خاتمے کے لیے عزم استحکام کے تحت کارروائیاں جاری رکھی جائیں گی۔
صدر مملکت کا سیکیورٹی فورسز کو خراج تحسین
صدر مملکت آصف علی زرداری نے بلوچستان میں 21 دہشتگردوں کو ہلاک کرنے پر سیکیورٹی فورسز کو خراج تحسین کرتے ہوئے سیکیورٹی فورسز کی صلاحیتوں کی سراہا۔
آصف علی زرداری نے 2 افسران، کسٹمز اہلکار اور 6 جوانوں کی شہادت پر رنج و غم کا اظہار کرتے ہوئے کہا کہ شہدا نے فرض کی ادائیگی میں جانیں قربان کر کے دفاع وطن کی مثال قائم کی۔
دہشتگردی کیخلاف جنگ میں جوانوں کی قربانیاں ہرگز رائیگاں نہیں جائیں گی، وزیر اعظم
وزیر اعظم شہباز شریف نے بلوچستان میں 21 دہشتگردوں کو ہلاک کرنے پر سیکیورٹی فورسز کو خراج تحسین پیش کیا جبکہ کسٹمز کے 2 افسران اور ایک اہلکار سمیت 6 بہادر جوانوں کی شہادت پر افسوس کا اظہار کیا۔
شہباز شریف نے کہا کہ شہدا کے خاندانوں کے غم میں برابر کے شریک ہیں اور دہشتگردی کے خلاف جنگ میں جوانوں کی قربانیاں ہرگز رائیگاں نہیں جائیں گی۔ حکومت ملک سے دہشتگردی کے مکمل خاتمے کے لیے پرعزم ہے۔
دہشتگردوں کا خاتمہ ریاست کے مضبوط عزم کا ثبوت ہے، معاون وزیر اعلیٰ بلوچستان
سیکیورٹی فورسز کی کارروائیوں پر وزیر اعلیٰ بلوچستان شاہد رند نے کہا کہ نوکچہ ،چاغی اور زیارت کراس پشین میں سیکیورٹی فورسز کی کارروائیاں قابل تحسین ہیں۔ 21 دہشتگردوں کا خاتمہ ریاست کے مضبوط عزم کا ثبوت ہے۔
انہوں نے کہا کہ دہشت گردوں نے قومی شاہراہوں پر آمدورفت میں خلل ڈالنے کی کوشش کی اور سیکیورٹی فورسز نے بروقت کارروائی سے دہشتگردوں کے عزائم ناکام بنا دیئے۔ کسٹمز ہاؤس پر حملہ دہشتگردی اور جرائم کے گٹھ جوڑ کی واضح مثال ہے۔
شاہد رند کا کہنا تھا کہ شہادت پانے والے اہلکاروں کی قربانیاں قوم ہمیشہ یاد رکھے گی۔ جبکہ دہشتگردی اور جرائم کے گٹھ جوڑ کو کسی صورت برداشت نہیں کیا جائے گا۔
سیکیورٹی فورسز کی آواران میں کارروائی
دو روز قبل سیکیورٹی فورسز نے بلوچستان کے ضلع آواران میں آپریشن رد الفتنہ 3 کے تحت کارروائی کرتے ہوئے 4 خوارجیوں کو ہلاک کر دیا تھا۔ جن کے قبضے سے بھاری تعداد میں اسلحہ برآمد ہوا۔
وزیر اعلیٰ بلوچستان کا کہنا تھا کہ 4 خوارج کا ہلاک ہونا سیکیورٹی فورسز کی موثر حکمت عملی کا ثبوت ہے۔ مصدقہ اطلاعات پر کارروائی اور جدید ٹیکنالوجی کا استعمال فورسز کی صلاحیتوں کا مظہر ہے۔
