ونڈہوک: نمیبیا نے سہ فریقی ٹی20 سیریز کے پہلے میچ میں جنوبی افریقہ کو 18 رنز سے شکست دے دی۔
نمیبیا نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 163 رنز بنائے، جس کے جواب میں جنوبی افریقہ کی ٹیم 20 اوورز میں 9 وکٹوں پر 145 رنز بنا سکی۔
نمیبیا کی اننگز میں جان فرائیلنک نمایاں رہے، انہوں نے 38 گیندوں پر 60 رنز کی جارحانہ اننگز کھیلی، جبکہ لورین اسٹینکیمپ نے 29 گیندوں پر 41 رنز بنائے۔
سب سے زیادہ پڑھی جانے والی
آخری اوورز میں روبن ٹرمپلمان نے صرف 6 گیندوں پر 12 رنز بنا کر مجموعے کو 163 تک پہنچانے میں اہم کردار ادا کیا۔
جنوبی افریقہ کی جانب سے ڈیوڈ بریوس نے شاندار مزاحمت کرتے ہوئے 50 گیندوں پر 75 رنز بنائے، ان کی اننگز میں 4 چوکے اور 5 چھکے شامل تھے۔
بریوس کے آؤٹ ہونے کے بعد جنوبی افریقہ کی جیت کی امیدیں دم توڑ گئیں۔ ڈوان جانسن نے 17 گیندوں پر 25 رنز بنائے لیکن ٹیم مطلوبہ ہدف حاصل نہ کرسکی۔
نمیبیا کے بولرز نے اختتامی اوورز میں جنوبی افریقہ کے بلے بازوں کو دباؤ میں رکھا۔ روبن ٹرمپلمان نے 4 اوورز میں 24 رنز دے کر 3 وکٹیں حاصل کیں جبکہ جے جے اسمتھ نے بھی 3 وکٹیں اپنے نام کیں۔ گیرہارڈ ایراسمس اور میکس ہائنگو نے ایک، ایک وکٹ حاصل کی۔
نمیبیا کی جانب سے جے جے اسمتھ کو پلیئر آف دی میچ قرار دیا گیا، جبکہ روبن ٹرمپلمان میچ کے نمایاں ترین کھلاڑیوں میں رہے۔
