اسلام آباد:پمز نرسری میں آتشزدگی کے واقعے میں 14بچے جاں بحق ہو گئے۔
ڈی جی کیپٹل ایمرجنسی سروسز نے بچوں کے جاں بحق ہونے کی تصدیق کر دی ہے،ضلعی انتظامیہ کا کہنا ہے کہ پمز نرسری میں لگی آگ بجھا لی گئی ہے۔
پمز اسپتال کی تیسری منزل پر واقع گائنی وارڈ میں آتشزدگی کے واقعے پر قابو پالیا گیا ہے۔ ضلعی انتظامیہ کے مطابق فائر فائٹرز اور 6 ایمبولینسز نے امدادی کارروائیوں میں حصہ لیا اور خواتین سمیت 19 افراد کو بحفاظت نکال لیا گیا۔
چیف کمشنر اسلام آباد سہیل اشرف اور آئی جی اسلام آباد علی ناصر رضوی نے پمز اسپتال پہنچ کر امدادی سرگرمیوں کا جائزہ لیا۔ آئی جی اسلام آباد نے چیف کمشنر کو امدادی کارروائیوں کے حوالے سے بریفنگ بھی دی۔ ریسکیو ذرائع کا کہنا ہے کہ آگ کمپریسر پھٹنے کی وجہ سے لگی۔
ایگزیکٹو ڈائریکٹر پمز عمران سکندر کے مطابق واقعے کی تمام پہلوؤں سے تحقیقات کی جائیں گی اور وارڈ میں آگ لگنے کی وجوہات کا تعین کیا جا رہا ہے۔
ضلعی انتظامیہ کے مطابق واقعے کی انکوائری کے لیے ایڈیشنل ڈپٹی کمشنر جنرل کی سربراہی میں کمیٹی تشکیل دے دی گئی ہے۔
وزیراعظم کا اظہارِ افسوس، فوری تحقیقات کا حکم
وزیراعظم محمد شہباز شریف نے پمز ہسپتال کی نرسری میں آتشزدگی کے اندوہناک واقعے میں 14 نومولود بچوں کے جاں بحق ہونے پر گہرے دکھ اور دلی افسوس کا اظہار کیا ہے۔
وزیراعظم نے واقعے کا نوٹس لیتے ہوئے حکام کو فوری تحقیقات کی ہدایت کی ہے۔ ان کا کہنا ہے کہ بچوں کے ساتھ اس طرح کا واقعہ ناقابلِ تلافی ہے، واقعے کے محرکات کا تفصیلی جائزہ لیا جائے، ذمہ داران کا تعین کیا جائے اور ان کے خلاف سخت سے سخت کارروائی عمل میں لائی جائے۔
وزیراعظم محمد شہباز شریف نے جاں بحق ہونے والے معصوم بچوں کے لواحقین سے دلی تعزیت اور ہمدردی کا اظہار کرتے ہوئے کہا کہ اس اندوہناک واقعے پر دل رنجیدہ ہے، حکومت غمزدہ والدین کے دکھ میں برابر کی شریک ہے۔وزیراعظم نے دعا کی کہ اللہ تعالیٰ جاں بحق بچوں کے لواحقین کو صبرِ جمیل عطا فرمائے۔
