اقوام متحدہ کے سیکرٹری جنرل انتونیو گوتریس نے کہا ہے کہ ایران امریکا ثالثی پاکستان کی بہت بڑی کامیابی ہے، اقوام متحدہ پاکستان کے ساتھ کھڑا ہے۔
دفتر خارجہ اسلام آباد میں نائب وزیر اعظم اسحاق ڈار کے ہمراہ مشترکہ پریس کانفرنس کرتے ہوئے انہوں نے کہا کہ ترقی یافتہ ممالک کو اپنے وعدوں کا احترام کرنا چاہئے، پاکستان میرے دل کے بہت قریب ہے، افغان مہاجرین کی میزبانی میں پاکستانی عوام کی غیر معمولی سخاوت دیکھی۔پاکستان نے افغان پناہ گزینوں کے ساتھ اپنا سب کچھ بانٹا۔
انہوں نے کہا کہ مشکل حالات میں پاکستانیوں نےثابت قدمی، حوصلے اور عزم کا اظہار کیا،پاکستان بڑے تنازعات میں اہم ثالث کے طور پر اپنی صلاحیت اور اعتبار ثابت کرچکا ہے۔پاکستان کو فریقین کی طرف سے قبول کیا جاتا ہے۔
سب سے زیادہ پڑھی جانے والی
قبل ازیں صحافیوں سے گفتگو کرتے ہوئے انہوں نے کہا کہ جب میں پناہ گزینوں کا کمشنر تھا، میں نے اپنے 10 سالہ مدت کے دوران دیکھا کہ پاکستانی عوام نے افغان پناہ گزینوں کا جس طرح استقبال کیا۔ پاکستان نے افغان پناہ گزینوں کے ساتھ اپنا سب کچھ بانٹا، وہ سخاوت اور یکجہتی کی نا قابلِ یقین مثال تھی۔
صحافی کے اس سوال کہ دوسری بار پاکستان کے دورے کا کیا مقصد ہے اور واشنگٹن اور تہران کے درمیان امن قائم کرنے میں پاکستان کے سفارتی کردار پر کیا کہیں گے؟ پر انتونیو گوتریس نے کہا کہ پاکستان میرے دل کے بہت قریب ہے، میں اقوام متحدہ کے سیکرٹری جنرل کے طور پر اپنا دورِ دوبارہ پاکستان آئے بغیر مکمل نہیں کر سکتا تھا۔
انہوں نے مزید کہا کہ ایک طرف مشرق وسطیٰ اور دوسری طرف یوکرین کی جنگ ہے، پاکستان نے امریکا اور ایران کے درمیان زبردست سہولت کاری کی، پاکستان نے وہ کام کر دکھایا جو تقسیم شدہ دنیا میں آج بہت مشکل کام ہے۔
ان کا کہنا تھا کہ میں ان مشکل لمحوں میں بھی پاکستان آیا جب دہشتگرد جنوب کی طرف تقریباً اسلام آباد کے قریب تک پہنچ گئے تھے، دہشتگردی ہر صورت میں ناقابلِ قبول ہے، میں ایک بار پھر پاکستانی عوام کی دہشتگردی کے خلاف جنگ میں پائیداری اور ہمت دیکھ رہا ہوں۔
یو این سیکرٹری جنرل نے مزید کہا کہ میں نے دیکھا کہ کس طرح مشکل حالات میں پاکستانی ایک دوسرے کی مدد کر رہے تھے، پاکستانی بے گھر ہونے والے لوگوں کو جرات، حوصلے اور عزم کے ساتھ سہارا دے رہے تھے۔
بھارت پانی کو ہتھیار بنانے سے باز رہے، وزیر خارجہ
نائب وزیراعظم اور وزیر خارجہ اسحاق ڈار نے کہا ہے کہ بھارت پانی کو ہتھیار بنانے سے باز رہے جبکہ پاکستان دہشت گردی کے خلاف جنگ لڑ رہا ہے اور افغان سرزمین سے پاکستان کے خلاف ہونے والی دہشت گردی پر سخت تشویش ہے۔
اسحاق ڈار نے کہا کہ پاکستان کو افغان سرزمین کے پاکستان کے خلاف استعمال ہونے پر تشویش ہے۔ جبکہ پاکستان دہشت گردی سمیت مختلف چیلنجز سے نمٹ رہا ہے اور عالمی امن و سلامتی کے لیے اپنا کردار ادا کرتا رہے گا۔
انہوں نے کہا کہ اقوام متحدہ کے سیکرٹری جنرل انتونیو گوتریس سے خوشگوار ملاقات ہوئی، جس میں خطے کی صورتحال، باہمی دلچسپی کے امور اور عالمی معاملات پر تبادلہ خیال کیا گیا۔ ملاقات میں پائیدار ترقی، موسمیاتی تبدیلی اور کثیرالجہتی نظام کے مستقبل پر بھی گفتگو ہوئی۔
اسحاق ڈار نے کہا کہ پاکستان اقوام متحدہ کے ساتھ قریبی تعاون کو مزید مضبوط بنانے کے عزم پر قائم ہے۔ جبکہ پاکستان کثیرالجہتی نظام اور اقوام متحدہ کے منشور کی مضبوط حمایت کرتا ہے، اقوام متحدہ کی قراردادیں مذاکرات، ثالثی اور تنازعات کے پُرامن حل کی اہمیت اجاگر کرتی ہیں۔
نائب وزیراعظم نے کہا کہ انہوں نے اقوام متحدہ کے سیکرٹری جنرل کو مقبوضہ جموں و کشمیر کی صورتحال سے آگاہ کیا اور مذاکرات و کشیدگی میں کمی کے لیے پاکستان کی سفارتی کوششوں سے بھی آگاہ کیا۔
انہوں نے کہا کہ پاکستان نے امریکا اور ایران کے درمیان اسلام آباد میں ہونے والے مذاکرات میں سہولت کاری کی، تنازعات کے حل کے لیے مذاکرات اور سفارت کاری مؤثر ترین ذریعہ ہیں، جبکہ امریکا اور ایران کو 47 سال بعد مذاکرات کی میز پر لانا پاکستان کی سفارتی کوششوں کی منفرد مثال ہے۔
امن اور سفارت کاری کے ذریعے مسائل کے حل پر یقین رکھتے ہیں، اسحاق ڈار
اسحاق ڈار نے کہا کہ پاکستان امن، سلامتی اور سفارت کاری کے ذریعے مسائل کے حل پر یقین رکھتا ہے اور ریاستوں کی خودمختاری و علاقائی سالمیت کا حامی ہے۔ پاکستان عالمی چیلنجز کے حل کے لیے بھرپور کردار ادا کر رہا ہے۔
موسمیاتی تبدیلی کے حوالے سے اسحاق ڈار نے کہا کہ پاکستان موسمیاتی تبدیلی سے متاثرہ دنیا کے پہلے 10 ممالک میں شامل ہے۔
نائب وزیراعظم نے بھارت پر زور دیا کہ وہ پانی کو ہتھیار بنانے سے باز رہے۔ انہوں نے کہا کہ مسئلہ کشمیر سمیت بہت سی اقوام متحدہ کی قراردادوں پر تاحال عملدرآمد نہیں ہورہا۔
اسحاق ڈار کے مطابق اقوام متحدہ کے سیکریٹری جنرل انتونیو گوتریس نے اقوام متحدہ کے لیے پاکستان کی خدمات کو سراہا اور پاکستان کے عالمی ادارے میں کردار کو تسلیم کیا۔
قبل ازیں دفتر خارجہ کی جانب سے جاری بیان کے مطابق نائب وزیراعظم و وزیر خارجہ اسحاق ڈار اور اقوام متحدہ کے سیکرٹری جنرل انتونیو گوتریس کے درمیان وزارت خارجہ میں ملاقات ہوئی جس میں فلسطین، جموں و کشمیر، افغانستان، انسداد دہشت گردی اور کثیرالجہتی نظام کے مستقبل سمیت علاقائی و عالمی امن و سلامتی کے امور پر تبادلہ خیال کیا گیا۔
اس موقع پر اسحاق ڈار نے اقوام متحدہ کے سیکرٹری جنرل کو جموں و کشمیر اور سندھ طاس معاہدے سے متعلق پاکستان کے مؤقف سے آگاہ کیا۔
Deputy Prime Minister/Foreign Minister Senator Mohammad Ishaq Dar @MIshaqDar50 met UN Secretary-General António Guterres @antonioguterres in Islamabad. Discussions covered regional and global issues relating to peace and security, including Palestine, Jammu & Kashmir, Afghanistan, counter-terrorism, and the future of multilateralism.
DPM/FM briefed the UNSG on Pakistan’s positions on Jammu & Kashmir and the Indus Waters Treaty, reaffirming Pakistan’s call for a just and peaceful resolution of the Kashmir dispute in accordance with relevant UNSC resolutions.
DPM/FM highlighted Pakistan’s diplomatic efforts to promote dialogue and de-escalation, including its facilitation of the Islamabad Talks between the US and Iran. He reaffirmed Pakistan’s commitment to dialogue and diplomacy as the most effective means of resolving disputes.
The UNSG appreciated Pakistan’s longstanding contribution to the UN, as well as its diplomatic efforts to promote dialogue, mediation, and de-escalation.
— Ministry of Foreign Affairs – Pakistan (@ForeignOfficePk) October 6, 2026
نائب وزیراعظم نے جموں و کشمیر تنازع کے متعلقہ سلامتی کونسل کی قراردادوں کے مطابق منصفانہ اور پرامن حل کے لیے پاکستان کے مطالبے کا اعادہ کیا۔
اسحاق ڈار نے مذاکرات اور کشیدگی میں کمی کے لیے پاکستان کی سفارتی کوششوں سے آگاہ کرتے ہوئے کہا کہ پاکستان نے امریکا اور ایران کے درمیان اسلام آباد مذاکرات میں سہولت کاری کی، تنازعات کے حل کے لیے مذاکرات اور سفارت کاری مؤثر ترین ذریعہ ہیں۔
اس موقع پر اقوام متحدہ کے سیکرٹری جنرل نے اقوام متحدہ کے لیے پاکستان کی دیرینہ خدمات کو سراہا،انتونیو گوتریس نے امریکا اور ایران کے درمیان مذاکرات، ثالثی اور کشیدگی میں کمی کے لیے پاکستان کی سفارتی کوششوں کی بھی تعریف کی۔
اس سے قبل اقوام متحدہ کے سیکریٹری جنرل 3 روزہ سرکاری دورے پر اسلام آباد پہنچے،ترجمان دفتر خارجہ کے مطابق اسلام آباد آمد پر قائم مقام سیکرٹری خارجہ نبیل منیر نے ان کا استقبال کیا، انتونیو گوتریس کا دورہ آج سے 8 اکتوبر تک جاری رہے گا۔
UN Secretary-General H.E. António Guterres arrived in Islamabad today to undertake an official visit to Pakistan from 6–8 October 2026, at the invitation of Deputy Prime Minister/Foreign Minister Senator Mohammad Ishaq Dar.
Upon arrival, the Secretary-General was received by Acting Foreign Secretary Ambassador Nabeel Munir.
— Ministry of Foreign Affairs – Pakistan (@ForeignOfficePk) October 5, 2026
بعد ازاں اقوام متحدہ کے سیکرٹری جنرل انتونیو گوتریس وزارت خارجہ پہنچے جہاں وزیر خارجہ اسحاق ڈار نےان کا استقبال کیا۔ملاقات میں خطے کی صورتحال، باہمی دلچسپی کے امور اور عالمی امور پر تبادلہ خیال کیا گیا ۔
DPM/FM Senator Mohammad Ishaq Dar @MIshaqDar50 warmly received UN Secretary-General H.E. @antonioguterres at the Ministry of Foreign Affairs at the start of his official visit to Pakistan.
The two will shortly hold talks on Pakistan–UN cooperation and regional and international issues.
@UN
@PakistanUN_NY— Ministry of Foreign Affairs – Pakistan (@ForeignOfficePk) October 6, 2026
قبل ازیں ترجمان اقوام متحدہ نے بتایا کہ یو این سیکرٹری جنرل این ڈی ایم اے کا دورہ بھی کریں گے جہاں وہ قدرتی آفات سے نمٹنے کی تیاری اور صلاحیت کا مشاہدہ کریں گے۔ اس کے علاوہ انتونیو گوتریس پاک بھارت فوجی مبصر گروپ کے ہیڈ کوارٹرز کا بھی دورہ کریں گے۔
دورے کے دوران ان کی پاکستان حکام سے امریکا اور ایران کے درمیان سفارتی اور ثالثی کی کوششوں پر بھی بات چیت ہو گی، پاکستان کے تعمیری کردار اور خطے کی صورتحال پر بھی تبادلہ خیال کیا جائے گا۔
انتونیو گوتریس آخری مرتبہ 2022 میں پاکستان آئے تھے جب انہوں نے تباہ کن سیلاب سے متاثرہ علاقوں کا دورہ کیا تھا۔
UN Secretary-General Antonio Guterres says he has “never seen climate carnage” like the Pakistan floods https://t.co/YGqZnd9Grk https://t.co/Oq6VBE1WFK
— Al Jazeera English (@AJEnglish) September 10, 2022
صدر آصف علی زرداری نے اقوام متحدہ کے سیکرٹری جنرل انتونیو گوتریس کو نشانِ امتیاز سے نواز دیا
ایوانِ صدر میں اقوام متحدہ کے سیکرٹری جنرل انتونیو گوتریس کو قومی اعزاز نشانِ امتیاز دینے کی تقریب منعقد ہوئی، جہاں صدرِ مملکت آصف علی زرداری نے معزز مہمان کو یہ اعزاز عطا کیا۔
انتونیو گوتریس کو یہ اعزاز بین الاقوامی خدمات اور عالمی امن و انسانیت کے لیے ان کی خدمات کے اعتراف میں دیا گیا، وزیراعظم شہباز شریف نے بھی اقوام متحدہ کے سیکرٹری جنرل کو نشانِ امتیاز ملنے پر مبارکباد پیش کی۔
اعزاز حاصل کرنے کے بعد اپنے خطاب میں انتونیو گوتریس نے حکومتِ پاکستان کا شکریہ ادا کرتے ہوئے کہا کہ وہ اس اعلیٰ اعزاز پر دل کی گہرائیوں سے شکر گزار ہیں، انہوں نے کہا کہ وہ یہ اعزاز اقوام متحدہ میں خدمات انجام دینے والے تمام خواتین و حضرات کی جانب سے قبول کرتے ہیں۔
اقوام متحدہ کے سیکرٹری جنرل نے پاکستانی عوام کی مہمان نوازی اور فراخ دلی کو بھی سراہا، انہوں نے کہا کہ دہشت گردی کا سامنا کرتے ہوئے پاکستانی قوم کے عزم، یکجہتی اور استقامت کے معترف ہیں۔
انتونیو گوتریس نے اقوام متحدہ کے امن مشنز میں پاکستانی دستوں کی خدمات کو خراجِ تحسین پیش کرتے ہوئے کہا کہ پاکستانی امن دستے اس عظیم قوم کی حقیقی تصویر دنیا کے سامنے پیش کرتے ہیں۔
اپنی تقریر میں سیکرٹری جنرل اقوام متحدہ نے علامہ محمد اقبال کی شاعری کا بھی حوالہ دیا اور کہا کہ پاکستانی قوم طاقت اور عزم کے ساتھ ہمدردی کے جذبات بھی رکھتی ہے۔
انتونیو گوتریس نے پاکستان میں آنے والے تباہ کن سیلاب اور موسمیاتی بحران کا ذکر کرتے ہوئے کہا کہ انہوں نے پاکستانی عوام کی مشکلات اور تکالیف کو قریب سے محسوس کیا ہے۔
تقریب میں اعلیٰ حکام اور دیگر شخصیات نے شرکت کی، نشانِ امتیاز پاکستان کے اعلیٰ سول اعزازات میں شامل ہے، جو نمایاں خدمات کے اعتراف میں دیا جاتا ہے۔
اقوام متحدہ کے سیکرٹری جنرل انتونیو گوتریس کا این ڈی ایم اے ہیڈکوارٹرز کا دورہ
اقوام متحدہ کے سیکرٹری جنرل انتونیو گوتریس نے نیشنل ڈیزاسٹر مینجمنٹ اتھارٹی (این ڈی ایم اے) ہیڈکوارٹرز کا دورہ کیا، جہاں انہیں نیشنل ایمرجنسیز آپریشن سینٹر میں پاکستان کے جدید ڈیزاسٹر مینجمنٹ نظام، آفات سے نمٹنے کی تیاری اور قبل از وقت اقدامات کے حوالے سے تفصیلی بریفنگ دی گئی۔
چیئرمین این ڈی ایم اے لیفٹیننٹ جنرل انعام حیدر ملک نے اقوام متحدہ کے سیکرٹری جنرل کو پاکستان میں آفات سے نمٹنے اور خطرات کے تدارک کے لیے قائم نظام، نیشنل ایمرجنسیز آپریشن سینٹر اور اس کے فعال کردار سے آگاہ کیا۔
این ڈی ایم اے کی جانب سے نیشنل ایمرجنسیز آپریشن سینٹر کی نئی توسیعات، نیکسٹ جنریشن ٹیکنالوجی (این جی ٹی) اور گلوبل ریزیلینس ہب (جی آر ایچ) کے حوالے سے بھی بریفنگ دی گئی۔
بریفنگ میں بتایا گیا کہ این ڈی ایم اے اپنے نیکسٹ جنریشن ٹیکنالوجی منصوبے کے تحت مصنوعی ذہانت، مشین لرننگ اور جدید ڈیٹا سسٹمز کو استعمال میں لائے گا۔
ان جدید ٹیکنالوجیز کے ذریعے آفات کی زیادہ درست اور بروقت پیشگی تشخیص، تیاری اور خطرات سے پہلے نمٹنے کی صلاحیتوں کو بہتر بنایا جائے گا۔
این ڈی ایم اے نے اقوام متحدہ کے سیکرٹری جنرل کو گلوبل ریزیلینس ہب کے بارے میں بھی آگاہ کیا۔ بریفنگ میں بتایا گیا کہ جی آر ایچ کے ذریعے عالمی اور علاقائی سطح پر ڈیزاسٹر مینجمنٹ کے شعبے میں تعاون کو فروغ دیا جائے گا اور مختلف ممالک کے تجربات اور جدید طریقہ کار سے استفادہ کیا جائے گا۔
این ڈی ایم اے ٹیم نے ملکی اور علاقائی سطح پر ممکنہ خطرات کے حوالے سے ”نیشنل اینڈ گلوبل ڈیزاسٹر لینز 2026-27“ پر بھی بریفنگ دی۔
حکام کے مطابق ڈیزاسٹر لینز کے ذریعے جدید ٹیکنالوجی، ڈیٹا اور تجزیاتی صلاحیتوں کو بروئے کار لاکر ممکنہ خطرات کی بروقت نشاندہی اور پیشگی اقدامات میں مدد ملے گی۔
اقوام متحدہ کے سیکرٹری جنرل انتونیو گوتریس نے پاکستان کی جانب سے آفات سے نمٹنے کے لیے پیشگی تیاری، ارلی وارننگ سسٹم اور قبل از وقت اقدامات کو سراہا۔
انہوں نے موسمیاتی تبدیلی اور قدرتی آفات کے بڑھتے ہوئے خطرات سے نمٹنے کے لیے عالمی تعاون کی اہمیت پر زور دیا۔
دورے کے دوران پاکستان اور اقوام متحدہ نے آفات اور موسمیاتی خطرات کے تدارک، قبل از وقت وارننگ اور انسانی فلاح کے شعبوں میں تعاون مزید مضبوط بنانے پر اتفاق کیا۔
دونوں جانب سے ٹیکنالوجی، جدت اور عالمی شراکت داری کے ذریعے آفات سے نمٹنے کی صلاحیتیں مزید مستحکم کرنے کے عزم کا بھی اعادہ کیا گیا۔
