راولپنڈی: بانی پاکستان تحریک انصاف (پی ٹی آئی) عمران خان کو آج ہی اڈیالہ جیل سے اسلام آباد کے شفا انٹرنیشنل اسپتال منتقل کیے جانے کا امکان ہے، جبکہ ان کی منتقلی کے لیے انتظامات مکمل کرلیے گئے۔
ذرائع کے مطابق شفا انٹرنیشنل اسپتال کے باہر سیکیورٹی کے سخت انتظامات کیے گئے ہیں اور پولیس کی بھاری نفری بھی تعینات کردی گئی ہے۔ اسپتال کے اطراف سڑک کنارے کھڑی گاڑیوں کو لفٹرز کے ذریعے ہٹا دیا گیا ہے۔
پولیس نے اسپتال جانے والے راستوں کو رکاوٹیں کھڑی کر کے ٹریفک کے لیے بند کر دیا ہے۔ جبکہ آئی جی اسلام آباد نے انتظامات کا جائزہ لینے کے لیے شفا انٹرنیشنل اسپتال کا دورہ بھی کیا۔
اسپتال ذرائع کے مطابق عمران خان کے علاج کے لیے خصوصی انتظامات کیے گئے ہیں۔ اسپتال پہنچنے پر ایمرجنسی میں ان کا ابتدائی طبی معائنہ کیا جائے گا، جس کے لیے 6 ماہر ڈاکٹروں پر مشتمل ٹیم تیار ہے۔
ذرائع کا کہنا ہے کہ ڈاکٹروں کے معائنے کے بعد عمران خان کو اسپتال میں داخل کرنے یا نہ کرنے کا فیصلہ کیا جائے گا۔ اگر انہیں ایڈمٹ کیا گیا تو اس حوالے سے بھی خصوصی انتظامات مکمل کرلیے گئے ہیں۔
یاد رہے کہ سپریم کورٹ نے عمران خان کو دو روز کے اندر شفا انٹرنیشنل اسپتال منتقل کرنے کا حکم دیا تھا۔
یہ بھی پڑھیں: عمران خان کی اسپتال منتقلی کے فیصلے پر نظرثانی درخواست دوبارہ دائر کر دی ہے، رانا ثنا اللہ
دوسری جانب عمران خان کے وکیل خالد یوسف چوہدری نے کہا ہے کہ عمران خان کو اسپتال منتقل کرنے کے تمام قانونی تقاضے گزشتہ روز پورے کر لیے گئے تھے، اگر آج ان کو اسپتال منتقل نہ کیا گیا تو کل ہم توہین عدالت کی درخواست دائر کریں گے۔
الحمداللہ۔
کل عمران خان صاحب کو ہسپتال منتقل کرنے کے تمام قانونی لوازمات پورے کر دیئے تھے اور آج اگر منتقل نہیں کیا جاتا تو کل ہر حال میں توہین عدالت کی درخواست دائر کریں گے۔ https://t.co/HBGU1EBNug— Khalid Yousaf Chaudry (@KhalidYChaudry) August 20, 2026
اس سے قبل وزیر قانون اعظم نذیر تارڑ نے عمران خان کی اسپتال منتقلی سے متعلق سوال پر کہا کہ رات 12 بجے تک کا وقت ہے، یہ اسلام آباد انتظامیہ کی ذمہ داری ہے اور جو کچھ کرنا ہے وہ کر رہے ہیں۔
