جڑواں شہروں میں وقفے وقفے سے تیز بارش کا سلسلہ جاری ہے جس کے بعد سڑکیں اور نشیبی علاقے زیر آب آ چکے ہیں جبکہ نالہ لئی میں بھی پانی کی سطح بلند ہو گئی ہے۔
بارش سے پیدا ہونے والی صورتحال کو کنٹرول کرنے لیے واٹر اینڈ سنیٹائزیشن اتھارٹی (واسا) ہائی الرٹ پر ہے۔
واسا کے ڈائریکٹر جنرل کے مطابق سید پورمیں 31، گولڑہ 40، بوکرہ 17، شمس آباد 13 اورنیو کٹاریاں میں 17ملی میٹربارش ریکارڈ ہوئی ہے۔
محکمہ موسمیات کے مطابق راولپنڈی میں اب تک 50 ملی میٹر سے زیادہ بارش ہو چکی ہے جس کے بعد نشیبی علاقوں میں پانی گھروں میں داخل ہو گیا ہے۔
موسلا دھار بارش کے باعث اسلام آباد کے سیونتھ ایونیو انڈر پاس میں پانی جمع ہو گیا، جس سے ٹریفک کی روانی متاثر ہوئی ہے۔
اسی طرح راولپنڈی میں جناح پارک انڈر پاس میں بھی بارش کا پانی جمع ہوگیا ہے جس سے ٹریفک کی روانی متاثر ہوئی ہے۔
نالہ لئی میں پانی کی سطح بلند
نالہ لئی، جس سے اسلام آباد اور راولپنڈی دونوں شہروں سے بارش کا پانی جمع ہو کر دریائے سواں میں جا کر بہتا ہے، میں پانی کی سطح میں معمولی اضافہ ہوا ہے۔
گوالمنڈی کے مقام پر نالہ لئی کی سطح 7 فٹ تک بلند ہو گئی ہے جس سے آس پاس کی آبادیوں کا پانی کی زد میں آنے کا خدشہ پیدا ہو گیا ہے۔
اسی طرح کٹاریاں کے مقام پر پانی کی کی سطح 7.5 فٹ تک بلند ہو گئی ہے۔
ایم ڈی واسا کے مطابق ریسکیو اور واسا کا عملہ نشیبی علاقوں میں تعینات ہے جہاں پانی گلیوں میں پانی داخل ہوگیا ہے۔
آفندی کالونی، ڈھوک کالاخان، شکریال، فوجی کالونی، مگھا سنگھ اسٹیٹ کی گلیوں میں بھی بارشی پانی داخل ہو چکا ہے۔
نشیبی علاقوں کی سڑکیں اور گلیاں زیر آب ہونے کی وجہ سے ۔شہریوں کو مشکلات کا سامنا کرنا پڑ رہا ہے۔
ایم ڈی واسا کا کہنا ہے کہ نشیبی علاقوں میں واسا کا عملہ اورہیوی مشینری تعینات ہے۔
