نواب شاہ میں طوفانی بارش کے باعث گھروں کی چھتیں اور دیواریں گرنے کے نتیجے میں 6 افراد جاں بحق اور 50 سے زائد زخمی ہو گئے۔
ڈی سی شہید بینظیر آباد عبدالصمد نظاماٹی کے مطابق چھتیں اور دیواریں گرنے واقعات قاضی احمد ، خیر پور ناتھن شاہ اور دیگر علاقوں میں رونما ہوئے ، جاں بحق ہونے والوں میں 4 خواتین بھی شامل ہیں۔
طوفان کے باعث بجلی کے درجنوں پول بھی گر گئے جس کی وجہ سے رات گئے سے بجلی کی سپلائی کا نظام درہم برہم ہے ، طوفان کے باعث سیکڑوں سولر پلیٹیں بھی اڑ کر ٹوٹ گئیں۔
اس کے علاوہ لاڑکانہ میں طوفانی بارش کے باعث 132 کے وی مین سپلائی کے ٹاور گرنے سے بجلی کی سپلائی معطل ہو گئی۔
افغانستان میں بارش اور برفباری سے تباہی ، 61 افراد جاں بحق ، 450 مکانات تباہ
ڈپٹی کمشنر نے مزید بتایا کہ طوفان کے باعث 50 سے زائد افراد زخمی ہوئے، جن میں سے معمولی زخمی افراد کو ابتدائی طبی امداد اور علاج فراہم کرنے کے بعد اسپتالوں سے ڈسچارج کر دیا گیا، جبکہ دیگر زخمیوں کو مختلف طبی مراکز میں علاج معالجے کی سہولیات فراہم کی جا رہی ہیں۔
انہوں نے کہا کہ طوفان کے نتیجے میں ہونے والے جانی اور مالی نقصانات کے اعداد و شمار جمع کیے جا رہے ہیں اور ضلعی انتظامیہ صورتحال کی مسلسل نگرانی کر رہی ہے۔
