اسلام آباد: چیئرمین پاکستان تحریک انصاف (پی ٹی آئی) بیرسٹر گوہر نے کہا ہے کہ وزیر اعظم شہباز شریف کی پیشکش کو مثبت انداز میں لیتے ہیں۔
چیئرمین پی ٹی آئی بیرسٹر گوہر نے گفتگو کرتے ہوئے کہا کہ بھارت نے پاکستان پر بزدلانہ حملہ کیا ہے۔ اور بھارت نے اگر دوبارہ ایسی غلطی کی تو اسے مزید جواب ملے گا۔ بھارت نے جعفر ایکسپریس حملے کی کوئی بھی مذمت نہیں کی۔
انہوں نے کہا کہ پوری قوم اس وقت اپنی افواج کے ساتھ کھڑی ہے۔
یہ بھی پڑھیں: تاریک رات کو چاندنی رات بنا دیا، یہ وقت اختلاف کا نہیں، وزیر اعظم کی اپوزیشن کو مذاکرات کی دعوت
شہباز شریف کی تقریر کے جواب میں بیرسٹر گوہر نے کہا کہ وزیر اعظم کی پیشکش کو مثبت انداز میں لیتے ہیں۔ اور ہم بھی چاہتے ہیں کہ مسائل کا حل بیٹھ کر مذاکرات کے ذریعے نکالا جائے۔
انہوں نے کہا کہ اگر اسپیکر صاحب آپ بھی کوئی کردار ادا کرنا چاہتے ہیں تو ہم خوش آمدید کہیں گے۔ بانی پی ٹی آئی کی ہدایت کے مطابق معاملات کو آگے بڑھائیں گے۔
