وفاقی کابینہ نے مدارس رجسٹریشن ترمیمی آرڈیننس سمیت دو صدارتی آرڈیننسز کی منظوری دے دی ہے۔
وزیر اعظم شہباز شریف کی زیر صدارت وفاقی کابینہ کا اجلاس ہوا، جس میں مدارس رجسٹریشن کے حوالے سے سوسائٹیز رجسٹریشن ترمیمی آرڈیننس کی منظوری دے دی۔
اجلاس میں انکم ٹیکس آرڈیننس کی بھی منظوری دے دی گئی، آرڈیننس کے ذریعے بینکوں کے 70 ارب روپے کے اضافی منافع پر ٹیکس وصولی ہو گی۔
اس سے ]پہلے وزیر اعظم محمد شہباز شریف کی صدارت میں ملک میں گیس کی سپلائی کے حوالے سے جائزہ اجلاس منعقد ہوا۔
وزیر اعظم نےگھریلو صارفین کو گیس سپلائی میں کمی کی شکایات پر نوٹس لیتے ہوئے کہا کہ موسم سرما میں گھریلو صارفین کو گیس کی بلا تعطل فراہمی کو فوری طور پر یقینی بنائی جائے۔
وزیر اعظم نے سسٹم کی ساخت میں اصلاحات لانے کی ہدایت کی تاکہ اس مسئلے کو مستقل طور پر حل کیا جاسکے،گھریلو صارفین کو گیس کی فراہمی حکومت کی اولین ترجیح ہے۔
وزیراعظم کو اس موقع پر بریفنگ میں بتایا گیا کہ سسٹم میں سرپلس آر ایل این جی موجود ہےجس کی وجہ سے گیس لوڈ مینجمنٹ میں پچھلے سال کی نسبت بہتری آئی ہے،پچھلے سال کی نسبت اس سال گیس لوڈ شیڈنگ کا دورانیہ کم ہے۔
بریفنگ میں بتایا گیا کہ گھریلو صارفین کو صبح 5 بجے سے رات 10 بجے تک گیس فراہم کی جارہی ہے،پاور سیکٹر کو بھی گیس ڈیمانڈ کے مطابق دی جا رہی ہے،صارفین کی شکایات کے حوالے سے ایس این جی پی ایل اور ایس ایس جی سی کے آن لائن ڈیش بورڈز کام کر رہے ہیں۔
