اسلام آباد: چیئرمین پی سی بی محسن نقوی نے کہا کہ چیمپئنز ٹرافی ٹورنامنٹ کے لیے تیار ہیں، پاکستان کے اصولی مؤقف کو ہر کسی نے سراہا۔
چیئرمین پاکستان کرکٹ بورڈ (پی سی بی) محسن نقوی کی زیرصدارت گورننگ بورڈ کا اجلاس ہوا۔ جس میں گورننگ بورڈ کے گزشتہ اجلاس کے فیصلوں کی توثیق کی گئی۔ آئی سی سی چیمپئنز ٹرافی ٹورنامنٹ پر اب تک کی پیشرفت سے آگاہ کیا گیا۔
گورننگ بورڈ کو قذافی، نیشنل اور راولپنڈی اسٹیڈیم کی تعمیر نو میں پیشرفت پر بھی بریفنگ دی گئی۔ جبکہ چیئرمین پاکستان کرکٹ بورڈ نے گورننگ بورڈ کو چیمپئنز ٹرافی سے متعلق اعتماد میں لیا۔ گورننگ بورڈ نے اسٹیڈیمز کی تعمیر نو کے کام پر اطمینان کا اظہار کیا۔
یہ بھی پڑھیں: آئی سی سی چیمپئنز ٹرافی 3 وینیوز پر کرائے جانے کا امکان
چیئرمین پی سی بی محسن نقوی نے کہا کہ پی سی بی چیمپئنز ٹرافی ٹورنامنٹ کے انعقاد کے لیے ہر لحاظ سے تیار ہے۔ اور چیمپئنز ٹرافی کے لیے ہر طرح کی تیاریاں مکمل ہیں۔ پاکستان کے اصولی مؤقف کو ہر کسی نے سراہا ہے۔
انہوں نے کہا کہ چیمپئنز ٹرافی ٹورنامنٹ پاکستان کی عزت ہے۔ اور پاکستانی تمام ٹیموں کو اپنے گراؤنڈز پر کھیلتا ہوا دیکھنا چاہتے ہیں۔ کرکٹ میں سیاست کا حامی نہیں۔ جبکہ کرکٹ سے کروڑوں شائقین محبت کرتے ہیں۔
محسن نقوی نے کہا کہ کھیل کو کھیل رہنا چاہیے۔ چیمپئنز ٹرافی ٹورنامنٹ سے قبل اسٹیڈیمز کی تعمیر نو کا کام مکمل ہو جائے گا۔
