لاہور: پنجاب حکومت نے جانور سیل پوائنٹس نو پرافٹ نو لاس کی بنیاد پر قائم کرنے کا اعلان کر دیا۔ عیدالاضحی سے 10 روز قبل اور 3 روز بعد تک میونسپل ملازمین کی چھٹیوں پر بھی پابندی عائد ہو گی۔
پنجاب حکومت نے قربانی کے جانوروں کے سیل پوائنٹس پر کوئی فیس نہ لینے کا فیصلہ کر لیا۔ وزیر اعلیٰ پنجاب مریم نواز نے بکرا عید پر زیرو ویسٹ یقینی بنانے کی ہدایت کر دی۔
وزیر بلدیات ذیشان رفیق کی زیر صدارت پنجاب بھر کے میونسپل اداروں کے چیف آفیسرز کا اجلاس منعقد ہوا۔ اجلاس میں سیکرٹری بلدیات شکیل احمد میاں، ایڈیشنل سیکرٹری ماریہ طارق اور دیگر نے بھی شرکت کی۔
اجلاس میں سیکرٹری لوکل گورنمنٹ بورڈ نے شرکا کو بریف کیا کہ عیدالاضحی پلان کو حتمی شکل دے دی گئی ہے۔
یہ بھی پڑھیں: بغیر اجازت قربانی کے جانوروں کی کھالیں جمع کرنے پر پابندی عائد
وزیر بلدیات نے بتایا کہ جانور سیل پوائنٹس نو پرافٹ نو لاس کی بنیاد پر قائم کیے جائیں گے۔ عیدالاضحی سے 10 روز قبل اور 3 روز بعد تک میونسپل ملازمین کی چھٹیوں پر پابندی عائد ہو گی۔
انہوں نے ہدایت کی کہ شہروں میں قربانی والے ہر گھر میں ماحول دوست بیگز مفت فراہم کریں۔
وزیر بلدیات ذیشان رفیق نے بتایا کہ مختلف شہروں میں جانور سیل پوائنٹس کے خود اچانک دورے کروں گا۔ وزیر اعلیٰ پنجاب کی واضح ہدایات ہیں کہ صفائی کے انتظامات پر سمجھوتہ نہیں ہو گا۔ محکمہ بلدیات کے سینئر افسر بھی فیلڈ کے دورے کریں۔
انہوں نے کہا کہ ڈیڈ لائن ختم ہونے کا انتظار کیے بغیر آلائشیں ساتھ ساتھ ٹھکانے لگائیں۔
وزیر بلدیات نے ہر بلدیہ سے عیدالاضحی کی حکمت عملی تحریری طور پر طلب کر لی اور ہدایت دی کہ نمایاں مقامات اور سیل پوائنٹس پر اپنا موبائل نمبر آویزاں کریں۔ عید کی چھٹیوں میں صفائی میں کوتاہی برداشت نہیں کروں گا۔
