ماسکو: روس کے نائب وزیر دفاع تیمور ایوانوف کو کرپشن کے الزامات پر حراست میں لے کر تفتیش شروع کر دی گئی۔
غیر ملکی خبر رساں ایجنسی کے مطابق روس کے انسداد بدعنوانی کے حکام نے نائب وزیر دفاع تیمور ایوانوف کو رشوت لینے کے شبہ میں گرفتار کیا گیا۔
قانون نافذ کرنے والے اداروں کی خصوصی کمیٹی کے مطابق روسی فیڈریشن کے نائب وزیر دفاع تیمور وادیمووچ ایوانوف کو ضابطہ فوجداری کے آرٹیکل 290 کے سیکشن 6 کے تحت جرم کرنے کے شبے میں حراست میں لیا گیا۔
روسی نائب وزیر دفاع فوجی تنصیبات کی تعمیر کے انچارج اور وزارت دفاع کے اعلیٰ عہدیدار کے طور پر یورپی یونین کی پابندیوں کی زد میں ہیں۔
یہ بھی پڑھیں: امریکہ کا ایک بار پھر پاکستان پر پابندیاں عائد کرنے کا اشارہ
تیمور ایوانوف 2022 میں آنجہانی اپوزیشن لیڈر الیکسی ناوالنی کی اینٹی کرپشن فاؤنڈیشن کی طرف سے شائع ہونے والی تحقیقات کا موضوع تھے۔
اپوزیشن کی شائع ہونے والی رپورٹ میں کہا گیا تھا کہ نائب وزیر دفاع نے یوکرین کے ماریوپول میں تعمیراتی منصوبوں کی نگرانی کی اور ان سے فائدہ اٹھایا جو ایک ماہ کے طویل محاصرے کے بعد ماسکو کے کنٹرول میں آ گیا۔
