سابق وفاقی وزیر فواد چوہدری کی اہلیہ حبا فواد کو اسلام آباد ہائیکورٹ نے بیرون ملک جانے کی اجازت دے دی۔
ہائی کورٹ اسلام آباد کے جسٹس محسن اختر کیانی نے حبا فواد کا نام نو فلائی لسٹ سے نکالنے کی درخواست پر سماعت کی۔
اسٹنٹ اٹارنی جنرل عثمان کمسن ، درخواست گزار فواد چوہدری کی اہلیہ کے وکیل قیصر امام اور دیگر عدالت میں پیش ہوئے۔
اسٹنٹ اٹارنی جنرل نے دلائل میں کہا کہ درخواست گزار کا نام نوفلائی لسٹ میں شامل نہیں ہے۔
اسلام آباد ہائی کورٹ نے ریمارکس دیے کہ درخواست گزار کے بیرون ملک جانے میں کوئی رکاوٹ نہیں، درخواست گزار وطن واپسی پر بیان حلفی دے کہ اسے بیرون ملک جانے میں کوئی دشواری پیش نہیں آئی ۔
عدالت نے درخواست پر مزید سماعت غیر معینہ مدت تک ملتوی کردی۔
