پنجاب اسمبلی کے جاری اجلاس میں مخصوص نشستوں پر 24 نومنتخب ارکان نے حلف اٹھا لیا۔
پنجاب اسمبلی کا اجلاس ایک گھنٹہ 29 منٹ تاخیر سے شروع ہوا، سپیکر ملک محمد احمد خان نے اجلاس کی صدارت کی۔ گنتی پر پنجاب اسمبلی کے اجلا س کا کورم پورا ہونے پر سپیکر نے نو منتخب ارکان کو حلف کو دعوت دے دی، سپیکر پنجاب اسمبلی کے حکم پر سیکرٹری اسمبلی نے پینل آف چئیر کے ناموں کا اعلان کردیا۔
رانا منورحسین، سیدعلی حیدر گیلانی، غلام مرتضی اور راحیلہ نعیم کے نام پینل آف چئیر مین شامل ہیں، سپیکر پنجاب اسمبلی کے مطابق گنتی کرنے پر ایوان میں ایک سو چار ارکان موجود تھے۔ اپوزیشن رکن رانا آفتاب نے ایوان میں خطاب کرتے ہوئے کہا کہ الیکشن جیتنے کے بعد ہمارے ارکان نے سنی اتحاد کونسل کو جوائن کیا، یہ ہماری سیٹیں ہیں یہ ہمیں دی جانی چاہیے۔
سینیٹر مشاہد حسین کا عمران خان کی رہائی،سنی اتحاد کونسل کو مخصوص نشستیں دینے کا مطالبہ
اپوزیشن رکن نے سپیکر پنجاب اسمبلی سے استدعا کی کہ ایوان کو رولز آف بزنس کے مطابق چلائیں۔ رانا آفتاب نے کہا کہ پنجاب اسمبلی مخصوص نشستوں کے متعلق فیصلہ عدالت میں زیر سماعت ہے حلف نہ لیا جائے، سپیکر ملک محمد احمد خان نے کہا کہ ہر کام آئین اور قانون کے مطابق کیا جارہا ہے، سنی اتحاد کونسل کے سربراہ لکھ کر دے چکے ہیں کہ انہوں نے الیکشن میں حصہ نہیں لیا۔
اپوزیشن ارکان نے ایوان میں شور شرابا کرتے ہوئے سپیکر ڈائس کا گھیرا کرلیا، اس دوران مخصوص نشستوں پر منتخب 21 خواتین ارکان اور 3 اقلیتی منتخب ارکان سے سپیکر پنجاب اسمبلی حلف لیا۔ اپوزیشن کی ایوان میں نعرے بازی جاری رہی، سپیکر نے کہا کہ معزز ممبران سے درخواست ہے کہ اپنے بنچز پر بیٹھ جائیں، ڈائس کے سامنے سے ہٹ جائیں۔
