تل ابیب: اسرائیلی صدر آئزک ہرزوگ نے کہا ہے کہ وہ حماس کے ساتھ ایک اور عارضی جنگ بندی کے لیے تیار ہیں۔
غیر ملکی خبر رساں ایجنسی کے مطابق اسرائیلی صدر آئزک ہرزوگ نے غیر ملکی سفیروں سے گفتگو کرتے ہوئے ایک اور عارضی جنگ بندی پر آمادگی کا اظہار کیا۔
اسرائیلی صدر آئزک ہرزوگ کے صدارتی آفس سے جاری بیان میں کہا گیا ہے کہ ہم یرغمالیوں کی رہائی کے لیے غزہ میں انسانی بنیادوں پر ایک اور وقفہ چاہتے ہیں۔
واضح رہے کہ قطر اور مصر کی جانب سے غزہ میں نئی جنگ بندی کی کوششیں جاری ہیں جبکہ نئی جنگ بندی پر بات چیت کے لیے قطری اور اسرائیلی حکام کی گزشتہ دنوں ملاقات بھی ہوئی تھی۔
دوسری جانب حماس غزہ میں مکمل جنگ بندی تک یرغمالیوں کی رہائی پر بات چیت کے امکان کو مسترد کر چکی ہے۔
یہ بھی پڑھیں: امریکہ کا 10 ملکی ٹاسک فورس بنانے کا اعلان
گزشتہ روز حماس کی جانب سے جاری بیان میں کہا گیا تھا کہ اسرائیل کے حملے مکمل رکنے تک یرغمالیوں سے متعلق بات چیت نہیں کریں گے۔
واضح رہے کہ 7 اکتوبر سے غزہ پر جاری اسرائیلی حملوں میں شہید فلسطینیوں کی تعداد 19 ہزار 6 سو سے بڑھ چکی ہے۔
