راولپنڈی ایکسپریس کے نام سے پہچانے جانے والے سابق کرکٹر شعیب اختر نے کہا ہے کہ افغان ٹیم کو سنجیدگی سے لینا پڑے گا کیونکہ چنئی میں اسپین ٹریک ہوگا، پاکستان کو مشکل پیش آسکتی ہے۔
ویڈیو بلاگنگ ویب سائٹ یوٹیوب پر جاری کردہ ویڈیو میں انہوں نے آئی سی سی ورلڈکپ میں آج ہونے والے پاک افغان میچ کے حوالے سے اظہار خیال کیا۔ انہوں نے قومی ٹیم کو خبردار کرتے ہوئے کہا کہ افغانستان کی ٹیم ہرگز کمزور نہیں۔
شعیب اختر کا کہنا تھا کہ سب جانتے ہیں کہ اس میچ میں گرما گرمی رہتی ہے اور رہنی بھی چاہیے۔ افغانستان ایک اچھی ٹیم ہے، کوئی ایسی ٹیم نہیں کہ اپ سیٹ ہوگا۔ اسپنرز ان کے پاس پورے ہیں اور پاکستان کو مسئلہ ہوگا۔
بھارت کیخلاف میچ میں قومی کرکٹ ٹیم کی کارکردگی مایوس کن تھی،شعیب اختر
سابق کرکٹر نے کہا کہ افغانستان کے پاس کراؤڈ اور گراؤنڈ سپورٹ دونوں ہوگی، چنئی کی پچز اچھی بنی ہوئی ہیں جس سے پاکستان کو مشکلات کا سامنا کرنا پڑے گا۔ وہاں کی کنڈیشنز افغانستان کے حق میں ہوں گی تاہم مجھے یقین ہے کہ ٹیم مایوس نہیں کرے گی۔
آسٹریلیا کیخلاف بینگلورو میں کھیلے گئے میچ سے متعلق انہوں نے کپتان بابراعظم پر تنقید کرتے ہوئے کہا کہ کینگروز کے خلاف بیٹنگ وکٹ پر ٹاس جیت کر باولنگ کا فیصلہ سمجھ نہیں آیا۔ بطور کپتان آپ بڑی ٹیموں کے خلاف پرفارم نہ کرکے بڑے کھلاڑی نہیں بن سکتے۔
