ارجنٹائن کو فیفا ورلڈکپ جتوانے والے لیونل میسی نے سعودی کلب الہلال سے کھیلنے کی پیشکش کو مسترد کیا ہے تاہم وہ سعودی عرب کے سیاحتی سفیر کے طور پر پرکشش معاہدے سے کروڑوں ڈالرز کما رہے ہیں۔
لیونل میسی نے سعودی عرب سے سیاحتی سفیر کے معاہدے پر سال 2021ء میں دستخط کیے تھے تاہم اس کی تفصیلات اب سامنے آئی ہیں، سیاحتی سفیر ہونے کے ناطے سعودی عرب اسٹار فٹبالر لیونل میسی کو 3سال کے دوران ڈھائی کروڑ ڈالرز یعنی (پاکستانی روپوں میں 7ارب 17کروڑ روپے سے زائد) معاوضہ ادا کرے گا جبکہ معاہدے کے تحت میسی کو سعودی مقامات کی تصاویر اپنے سوشل میڈیا اکاؤنٹس پر پوسٹ کرنا ہوں گی۔
بغیر بتائے سعودی عرب کیوں گئے؟ میسی مشکل میں پھنس گئے
اس کے علاوہ سعودی عرب کے خلاف کوئی منفی بیانات دینے سے گریز کرنا ہوگا،میسی رواں سال مئی میں اپنی فیملی کے ہمراہ سعودی عرب چھٹیاں منانے گئے تھے جس کی تصاویر بھی انہوں نے سوشل میڈیا پر شیئر کی تھیں جنہیں خوب پذیرائی حاصل ہوئی تھی۔
اس کے علاوہ لیونل میسی کو سال میں ایک بار خاندان کے ہمراہ سعودی عرب آنے پر 20 لاکھ ڈالرز دیے جائیں گے جبکہ سفری اخراجات بھی حکومت ہی ادا کرے گی۔
یاد رہے کہ پیرس سینٹ جرمن کلب چھوڑنے پر سعودی کلب الہلال نے انہیں 500ملین یورو (پاکستانی روپوں میں 1.5کھرب روپے سے زائد) کی پیشکش کی تھی لیکن میسی نے امریکی کلب انٹرمیامی کو ترجیح دی، میسی کا انٹر میامی سے معاہدہ طے پاگیا ہے لیکن تفصیلات ابھی سامنے نہیں آئی ہیں۔
