قومی کرکٹ ٹیم کے چیف سلیکٹر ہارون رشید نے واضح کیا ہے کے ہمارے پاس ٹی ٹوئنٹی ورلڈکپ کیلئے تجربات کرنے کا وقت ہے جبکہ ون ڈے ورلڈکپ کیلئے تجربات کرنے کا وقت نہیں۔
نجی ٹی وی چینل سے گفتگو کرتے ہوئے چیف سلیکٹر ہارون رشید کا کہنا تھا کہ رواں ماہ ہم نے پانچ ون ڈے نیوزی لینڈ کے خلاف کھیلنے ہیں۔ جس کے بعد تین ون ڈے میچز افغانستان کے خلاف اور اس کے بعد ایشیا کپ اور پھر ون ڈے ورلڈ کپ ہے۔ اس لیے ون ڈے ورلڈکپ کے لیے ہمیں 20 سے 22 کھلاڑیوں کے اردگرد رہنا پڑے گا۔
ہارون رشید نے کہا کہ پی سی بی کو ون ڈے میچز بڑھانے کا کہا ہے، ہمارے کھلاڑی ون ڈے کرکٹ بہت کم کھیلتے ہیں۔ ڈومیسٹک ٹی ٹوئنٹی کے ساتھ پاکستان سپر لیگ (پی ایس ایل) ہے جبکہ سال میں صرف ایک ون ڈے کپ ہوتا ہے۔ ون ڈے کرکٹ کے حوالے سے ہمیں سوچنے کی ضرورت ہے۔
محمد عامر کی واپسی سے متعلق چیف سلیکٹر کا بڑا بیان آگیا
چیف سلیکٹر کا مزید کہنا تھا کہ ہماری خواہش ہے کہ ریڈ بال اور وائٹ بال کے الگ الگ کھلاڑی ہوں لیکن ہماری بینچ اسٹرنتھ بڑی نہیں ہے۔ انگلینڈ ، آسٹریلیا اور انڈیا کے پاس بہت کھلاڑی ہیں جبکہ ہمارے پاس صرف 20 سے 24 کھلاڑیوں کا پول ہے۔
