لاہور: امیر جماعت اسلامی پاکستان سراج الحق نے کہا ہے کہ سیاستدانوں کی جائیدادیں نیلام کر کےرقم قومی خزانے میں جمع کرا دیا جائے۔
امیر جماعت اسلامی پاکستان سراج الحق نے عوام روڈ مارچ کے آغاز پر خطاب کرتے ہوئے کہا کہ پیپلز پارٹی، مسلم لیگ ن اور پاکستان تحریک انصاف (پی ٹی آئی) عوام سے مخلص نہیں ہے بلکہ تینوں جماعتیں ہی عوام کی دشمن ہیں۔ صرف 70 لاکھ نوجوان پاکستان ڈیمو کریٹک موومنٹ (پی ڈی ایم) کی وجہ سے بےروزگار ہو گئے۔
انہوں نے کہا کہ پی ٹی آئی، مسلم لیگ ن اور پیپلز پارٹی کی سیاست خدمت نہیں کرسی کے لیے ہے اور آج عوام کو نہیں بلکہ ان کو قربانی کا بکرا بنانے کا وقت آ گیا ہے۔
یہ بھی پڑھیں: عوام پی ٹی آئی کو مسترد کرے گی تو ہم قبول کریں گے، علی محمد
سراج الحق نے کہا کہ پاکستان کے عوام ہم پر اعتماد کریں کیونکہ ہم کرپشن اور سودی نظام کو ختم کر سکتے ہیں اور ہم ایک ایک پیسہ بچا کر قوم پر خرچ کریں گے۔ حکمرانوں کے کتوں اور بلیوں کے لیے تو باہر سے خوراک آتی ہے لیکن یہاں گندم اور آٹا بھی میسر نہیں ہے۔
انہوں نے کہا کہ اسحاق ڈار نے دعویٰ کیا تھا میں معاشی جادوگر ہوں لیکن انہوں نے ملک، معیشت اور زراعت کو تباہ کر دیا۔ قرضہ پی ٹی آئی اور پی ڈی ایم والوں نے لیا ہے تو ان کی جائیدادوں کو نیلام کر کے پیسہ خزانے میں جمع کروایا جائے۔
امیر جماعت اسلامی نے کہا کہ حکومت کو وارننگ دیتا ہوں کہ اشیائے ضروریہ کی قیمتوں میں کمی کرو لیکن اگر ہماری آواز نہ سنی گئی تو ہمارے ہاتھ اور تمہارے گریبان ہوں گے۔
