گزشتہ روز مسجدِ نبوی ﷺ میں پیش آنے والے واقعے پر گرفتاریوں کے حوالے سے سعودی سفارت خانے کا ردِ عمل سامنے آگیا۔
ڈائریکٹر انفارمیشن سعودی سفارتخانہ فواد العثمین کے مطابق مسجد نبویﷺ میں پیش آنے والے واقعے کے بعد کچھ پاکستانی گرفتار ہوئے ہیں۔
فواد العثمین کا یہ بھی کہنا ہے کہ مسجد نبویﷺ کی بے حرمتی پر حراست کی کارروائی کی گئی، یہ گرفتاریاں سعودی قواعد توڑنے پر ہوئی ہیں۔
مسجد نبویؐ واقعہ: شاہد آفریدی اور محمد یوسف بھی بول پڑے
مسجد نبویﷺ میں نعرے بازی پر وزیر اطلاعات مریم اورنگزیب کا ردعمل
خیال رہے کہ گزشتہ روز مسجد نبویﷺ میں سیاسی نعرے بازی پر وزیر اطلاعات مریم اورنگزیب نے کہا تھا کہ کچھ مخصوص لوگوں نے مسجد نبویﷺ کا تقدس پامال کیا، ان کے لیڈر نے بدتمیزی کے سوا اور کچھ نہیں سکھایا، یہ معاشرے کی تباہی ہے۔
انہوں نے کہا کہ اس پاک زمین کو سیاست کے لیے استعمال نہیں کرنا چاہتی، انہوں نے جو اس معاشرے میں تباہی کی وہ آج آپ کے سامنے ہے۔
مریم اورنگزیب نے امید ظاہر کی کہ وقت لگے گا لیکن یہ رویے ہمارے مثبت رویوں سے تبدیل ہوں گے۔
انہوں نے بتایا کہ ہمارے کارکن بھی یہاں ہیں لیکن انہیں ہدایت کی گئی کہ ایسا رویہ نہ اپنایا جائے۔
وزیر اطلاعات نے کہا کہ سعودی عرب کے ساتھ تعلقات کے نئے دورکا آغاز ہورہا ہے۔ سعودی عرب کے ساتھ تمام شعبوں میں تعاون بڑھے گا۔
ان کا کہنا تھا کہ گزشتہ 4سال کے دوران قریبی دوست ممالک سے بھی تعلقات خراب ہوئے، سابقہ حکومت نے پوری دنیا سے تعلقات خراب کیے، انہیں بہتر کیا جائیگا۔
