کراچی: پاک سر زمین پارٹی (پی ایس پی) کے چیئرمین سید مصطفیٰ کمال کی بطور ’پروجیکٹ ڈائریکٹر گاربیج‘ معطلی کو سندھ ہائی کورٹ میں چیلنج کر دیا گیا ہے اور موقف اختیار کیا گیا ہے کہ معطلی کا نوٹیفکیشن غیرقانونی ہے۔
مئیر کراچی وسیم اختر کی جانب سے جاری کیے گئے معطلی کے نوٹیفکیشن کے خلاف درخواست سید محمد اقبال کاظمی نے دائر کی ہے جس میں وسیم اختر، مصطفیٰ کمال اور سیکریٹری بلدیات کو فریق بنایا گیا ہے۔
درخواست کے مطابق بارشوں کے باعث کراچی پانی میں ڈوب گیا ہے اور ابتر صورتحال پیدا ہو گئی ہے۔ درخواست گزار نے صورتحال کا ذمہ دار میئر کراچی اور محکمہ بلدیات کو قرار دیتے ہوئے تحریر کیا ہے کہ ان دونوں کی نااہلی کے باعث شہر کی صورتحال انتہائی خراب ہو چکی ہے۔
مئیر کراچی وسیم اختر اور محکمہ بلدیات اپنی ذمہ داریاں نبھانے کو تیار نہیں ہیں اس لیے مصطفیٰ کمال نے شہر کو کچرے سے پاک کرنے کے لیے 90 روزہ چیلنج قبول کیا۔
درخواست گزار سید محمد اقبال کاظمی نے موقف اختیار کیا ہے کہ پروجیکٹ ڈائریکٹر کی تعیناتی کے اگلے روز ہی انہیں معطل کر دیا گیا جو کہ غیرقانونی ہے۔
میئر کراچی وسیم اختر کو اگر مصطفیٰ کمال سے شکایت تھی تو ضابطے کے تحت پہلے اظہار وجوہ (شوکاز) نوٹس جاری کیا جاتا اور اس کے بعد معطلی عمل میں لائی جاتی مگر ایسا نہ کرکے قانون کی خلاف ورزی کی گئی لہٰذا نوٹیفکیشن کو غیرقانونی قرار دیا جائے۔
