راولپنڈی: افغان حکومت کے مشیر برائے قومی سلامتی حمد اللہ محب کی قیادت میں ایک وفد نے پاک فوج کے سربراہ جنرل قمر جاوید باجوہ سے ملاقات کی ہے جس میں باہمی دلچسپی سمیت خطے میں امن و استحکام سے متعلق امور پر تبادلہ خیال کیا گیا۔
پاک فوج کے شعبہ تعلقات عامہ( آئی ایس پی آر) کے مطابق ملاقات میں پاک افغان بارڈر مینجمنٹ اور افغان مفاہمتی عمل پر بھی تبادلہ خیال کیا گیا۔
افغانستان قومی سلامتی کونسل کے ٹوئٹر اکاؤنٹ پر جاری ایک مختصر بیان میں بتایا گیا ہے کہ راولپنڈی میں جنرل قمر جاوید باجوہ کی رہائش گاہ پر ہونے والی ملاقات میں افغان امن عمل، انسداد دہشت گردی میں تعاون اور علاقائی اقتصادی رابطوں کو فروغ دینے کے معاملے پر تبادلہ خیال کیا گیا۔
ISLAMABAD, High level Afghan delegation led by NSA @hmohib met with Pakistan Army Chief of Staff Gen Qamar Bajwa at his residence in Rawalpindi this evening. They discussed the Afghan peace process, cooperation on counterterrorism and regional economic connectivity.
— ONSC Press (@NSCAfghan) May 28, 2019
افغانستان کے مشیر قومی سلامتی آرمی چیف کی دعوت پر آج ہی 13 رکنی وفد کے ہمراہ پاکستان پہنچے ہیں۔ وفد میں وزارت دفاع، داخلہ، خارجہ اور قومی سلامتی امور کے حکام بھی شامل ہیں۔
ہم نیوز کو ملنے والی اطلاعات کے مطابق افغان مشیر کے ساتھ دوطرفہ سیکیورٹی معاملات اور افغانستان سے پاک سرزمین پر دہشت گرد کارروائیوں پر بات چیت کی گئی ہے۔
ذرائع نے بتایا ہے کہ افغان وفد کے دورہ پاکستان میں دونوں ممالک کے درمیان خفیہ معلومات کا تبادلہ اور افغان مفاہمتی عمل میں اب تک کی پیشرفت پر بھی بات ہوگی۔