راولپنڈی: آرمی چیف جنرل قمر جاوید باجوہ کا کہنا ہے پاکستان ایک امن پسند ملک ہے، لیکن اگر کسی بھی طرح کی دھمکیوں سے مرعوب نہیں ہوں گے اور نہ ہی کسی کی دباو میں آئیں گے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمرجاوید باجوہ نے لائن آف کنٹرول کے چڑی کوٹ اور بگسر سیکٹرز کا دورہ کیا۔ جس کے دوران انہیں مقامی کمانڈرز نے ایل او سی کی تازہ صورتحال پربریفنگ دی۔
آرمی چیف جنرل قمرجاوید باجوہ نے مسلح افواج کے جوانوں کے ساتھ بات چیت میں ان کی آپریشنل تیاریوں اور ان کے جذبے کو سراہا۔
جنرل قمرجاوید باجوہ کا کہنا تھا پاکستان ایک امن پسند ملک ہے لیکن ہم کسی کے دباو میں نہیں آئیں گے، اگر کسی طرح کی جارحیت دکھائی گئی تو اس کا اسی طرح جواب دیا جائے گا۔
اس سے قبل آرمی چیف جب دورے کے لیے پہنچے تو کورکمانڈرراولپنڈی لیفٹینٹ جنرل بلال اکبر نے ان کا استقبال کیا۔ اس موقع پر آرمی ائیرڈیفنس کے کمانڈر لیفٹینٹ جنرل حمودالزمان خان بھی موجود تھے۔
واضح رہے کہ اس سے قبل قومی سلامتی کمیٹی کے اجلاس میں وزیراعظم عمران خان بھارتی جارحیت کا بھرپوراور فیصلہ کن جواب دینے کے لیے مسلح افواج کو اختیاردے چکے ہیں۔
وزیراعظم عمران خان اپنے پالیسی بیان میں کہے چکے ہیں کہ بھارت نے اگرحملہ کیا توسوچیں گے نہیں جواب دیں گے۔
