اسلام آباد: نو منتخب وزیراعظم اورچیئرمین پاکستان تحریک انصاف عمران خان نے سردارعثمان احمد بزدار کو وزیراعلی پنجاب نامزد کردیا ہے۔
عمران خان نے اپنے ویڈیو پیغام میں کہا کہ عثمان احمد کو وزیراعلیٰ نامزد کرنے کی وجہ پاکستان تحریک انصاف کا وہ نظریہ ہے جس کے تحت پی ٹی آئی غریب اور پسے ہوئے طبقے کو اوپر لے کر آئے گی۔
انہوں نے کہا کہ نامزد وزیراعلیٰ کا تعلق پنجاب کے سب سے پسماندہ علاقے ڈیرہ غازی خان (ڈی جی خان) سے ہے جہاں نہ ڈاکٹر ہے، نہ صاف پانی اور نہ ہی بجلی، عثمان بزدار کے چناؤ کی وجہ بھی یہی ہے۔
دوسری جانب عثمان احمد بزدار کے خلاف نیب میں بھی ایک کیس زیر التوا ہے جس میں ان پر تحصیل نظامت کے دور میں بوگس بھرتیوں اور سرکاری خزانے کو نقصانات پہنچانے کے الزامات ہیں، نامزد وزیراعلیٰ کے کزن کی جانب سے نیب میں درخواست جمع کرائی گئی تھی۔
سردارعثمان بزدار:
سردارعثمان بزدار کے والد فتح محمد بزدار اپنے آبائی علاقے کے سردار ہونے کے ساتھ ساتھ ایک سیاست دان بھی ہیں، عثمان بزدار جنوبی پنجاب صوبہ محاذ کا بھی حصہ رہے ہیں۔
فتح محمد بزدار 1985 میں پہلی بار رکن پنجاب اسمبلی منتخب ہوئے اور مجموعی طور پر اب تک 3 بار انتخاب جیت چکے ہیں۔
فتح محمد بزدار 2002 میں مسلم لیگ ق کے پلیٹ فارم سے رکن اسمبلی منتخب ہوئے تو عثمان بزدار تحصیل تونسہ شریف کے ناظم بنے، 2008 میں فتح محمد بزدار مسلم لیگ ق کے ٹکٹ پر دوبارہ منتخب ہوئے تاہم فارورڈ بلاک کا حصہ بن کر بعد میں مسلم لیگ نون میں شمولیت اختیار کرلی۔
بزدار خاندان 2013 میں مسلم لیگ نون کے پلیٹ فارم سے الیکشن دنگل میں اترا تو پیپلزپارٹی کےنظام المحمود کے ہاتھوں شکست کھانا پڑی جبکہ 2018 کے حالیہ انتخابات سے قبل بزدار خاندان جنوبی پنجاب صوبہ محاذ میں شامل ہوا جس کے بعد پی ٹی آئی اور جنوبی پنجاب کے انضمام کے بعد عثمان بزدار پہلی بار انتخابی سیاست میں سامنے آئے۔
انہوں نے پی پی 286 ڈی جی خان ٹو سے 26 ہزار 897 ووٹ لیکر آزاد امیدوار خواجہ نظام المحمود کو شکست دی۔
