خیبر پختونخوا کے مختلف اضلاع میں سکیورٹی خدشات کے باعث دفعہ 144 نافذ کر دی گئی۔
انتظامیہ کی جانب سے جاری کردہ نوٹیفکیشن کے مطابق ڈیرہ اسماعیل خان ڈویژن کے تمام اضلاع میں دفعہ 144 نافذ کی گئی ہے۔ جن میں ٹانک، جنوبی وزیرستان اپر، جنوبی وزیرستان لوئر بھی شامل ہیں۔
نوٹیفکیشن کے مطابق ڈویژن میں امن و امان کی صورتحال کے باعث دفعہ 144 نافذ کی گئی ہے۔ جس کے تحت آمدورفت اور مختلف اقسام کی گاڑیوں کی نقل و حرکت پر پابندی ہو گی۔
جنوبی وزیرستان لوئر کے وانا اور اعظم ورسک میں لوڈر رکشوں، سنگل و ڈبل کیبن کارگو گاڑیوں، شہزور، مزدا، سوزوکی لوڈر اور ڈمپرز کی نقل و حرکت پر پابندی عائد کی گئی ہے۔ جو یکم اکتوبر رات 9 بجے سے 10 اکتوبر رات 9 بجے تک نافذ رہے گی۔
اِسی طرح جنوبی وزیرستان اپر میں بھی لوڈر رکشوں، کارگو گاڑیوں، شہزور، مزدا، سوزوکی لوڈر، ٹریکٹر ٹرالی اور ڈمپرز کی آمدورفت پر پابندی عائد ہے، جو 3 سے 5 اکتوبر تک جاری رہے گی۔
سب سے زیادہ پڑھی جانے والی
ڈیرہ اسماعیل خان میں ٹانک روڈ، کلاچی، ہتھالہ، کوٹ اٹل، گڑھ عبداللہ اور متعدد لنک روڈز پر آمدورفت محدود کردی گئی ہے، پابندی 4 سے 6 اکتوبر تک صبح 6 بجے سے شام 6 بجے تک نافذ رہے گی، جبکہ پوٹہ ہتھالہ بازار بھی بند رہے گا۔
ضلع ٹانک میں مختلف روٹس پر افراد، مسافر و کارگو گاڑیوں اور موٹر سائیکلوں کی نقل و حرکت پر پابندی عائد کی گئی ہے، جو 3 اکتوبر رات 9 بجے سے 5 اکتوبر دوپہر 12 بجے تک نافذ رہے گی۔
قانون نافذ کرنے والے اداروں، ہنگامی خدمات اور سکیورٹی فورسز کی اجازت سے ہونے والی ہنگامی نقل و حرکت کو پابندی سے استثنیٰ حاصل ہوگا، دفعہ 144 کی خلاف ورزی کرنے والوں کے خلاف پاکستان پینل کوڈ (پی پی سی) کی دفعہ 188 کے تحت کارروائی کی جائے گی۔
اس سے قبل 3 ستمبر کو بھی ڈیرہ اسماعیل خان میں امن و امان کی صورتحال کے پیش نظر دفعہ 144 نافذ کی گئی تھی جس میں متعدد سڑکوں پر آمدورفت مکمل بند تھی۔
