محکمہ موسمیات نے ملک کے مختلف علاقوں میں موسلادھار بارش کی پیشگوئی کر دی، اسلام آباد راولپنڈی میں اربن فلڈنگ کا خدشہ ظاہر کر دیا۔
اسلام آباد، راولپنڈی اور گردونواح میں آئندہ 12 سے 36 گھنٹوں کے دوران شدید بارش کا امکان ہے، پاکستان محکمہ موسمیات کے مطابق بالائی علاقوں میں بارش، تیز ہواؤں اور گرج چمک کا سلسلہ جاری رہے گا جبکہ بعض مقامات پر موسلادھار سے بہت موسلادھار بارش بھی ہوسکتی ہے۔
محکمہ موسمیات کے مطابق اسلام آباد اور راولپنڈی میں شدید بارش کے باعث نشیبی علاقوں میں اربن فلڈنگ کا خدشہ ہے۔ جہلم، گجرات، گوجرانوالہ، سیالکوٹ اور نارووال میں بھی شہری سیلاب کا خطرہ ظاہر کیا گیا ہے۔
مزید پڑھیں
مری، گلیات، پوٹھوہار اور دیگر پہاڑی علاقوں میں شدید بارش کے باعث مقامی ندی نالوں میں طغیانی اور لینڈ سلائیڈنگ کا بھی خدشہ ہے۔
محکمہ موسمیات کے مطابق بارشوں کی موجودہ صورتحال کی بڑی وجہ بالائی علاقوں پر اثرانداز ہونے والی مغربی ہواؤں کی لہر اور بحیرہ عرب و خلیج بنگال سے آنے والی مرطوب ہوائیں ہیں۔
راولپنڈی انتظامیہ نے ممکنہ شہری سیلاب کے پیش نظر متعلقہ اداروں کو ہائی الرٹ کردیا ہے، جبکہ واسا، ریسکیو 1122، ضلعی انتظامیہ، پولیس اور دیگر اداروں کو فیلڈ میں موجود رہنے اور نکاسی آب کے انتظامات یقینی بنانے کی ہدایت کی گئی ہے۔
واضح رہے کہ پاکستان محکمہ موسمیات نے آئندہ 24 گھنٹوں کے دوران ملک کے بالائی علاقوں میں بارش، تیز ہواؤں اور گرج چمک کے ساتھ موسلا دھار بارش کی پیش گوئی کی ہے، جبکہ بیشتر میدانی علاقوں میں موسم گرم اور مرطوب رہنے کا امکان ہے۔
خیبر پختونخوا میں ایبٹ آباد، باجوڑ، بنوں، بونیر، چارسدہ، ہری پور، مردان، نوشہرہ، پشاور، سوات، دیر، مانسہرہ، ملاکنڈ، کوہاٹ، کرم، وزیرستان اور دیگر علاقوں میں بارش کا امکان ہے۔
آئنندہ 12 سے 36 گھنٹوں کے دوران اسلام آباد، راولپنڈی اور مضافات میں شدید بارشوں کا الرٹ.#NullahLai #FlashFloodAlert #IslamabadRain #Rawalpindi #PMD #UrbanFlooding #WeatherAlert #Monsoon2026 #StaySafe #PakistanWeather pic.twitter.com/ZQSM3kMu7b
— Pak Met Department محکمہ موسمیات (@pmdgov) September 4, 2026
پنجاب میں اٹک، چکوال، گوجرانوالہ، گجرات، حافظ آباد، جہلم، خوشاب، لاہور، منڈی بہاؤالدین، میانوالی، نارووال، راولپنڈی، سرگودھا، شیخوپورہ اور سیالکوٹ میں بارش اور گرج چمک کے ساتھ بارش متوقع ہے۔
گلگت بلتستان میں بھی بعض مقامات پر بارش جبکہ بلوچستان کے موسل، شیرانی اور ژوب میں آندھی اور گرج چمک کے ساتھ بارش کا امکان ظاہر کیا گیا ہے۔
