وزیراعظم محمد شہباز شریف کی زیر صدارت جناح میڈیکل کمپلیکس و ریسرچ سینٹر اور فیڈرل گورنمنٹ پولی کلینک فیز ٹو ایکسٹینشن کی تعمیر کے حوالے سے جائزہ اجلاس ہوا، جس میں دونوں منصوبوں پر جاری کام، تعمیراتی ڈیزائن اور آئندہ کے لائحہ عمل کا تفصیلی جائزہ لیا گیا۔
اجلاس میں وزیراعظم کو مجوزہ جناح میڈیکل کمپلیکس و ریسرچ سینٹر کی عمارت کی تعمیر کے حوالے سے مختلف تعمیراتی ڈیزائن اور تجاویز پیش کی گئیں، جبکہ فیڈرل گورنمنٹ پولی کلینک فیز ٹو ایکسٹینشن کی تعمیر میں پیش رفت پر بھی بریفنگ دی گئی۔
وزیراعظم شہباز شریف نے اجلاس سے گفتگو کرتے ہوئے کہا کہ عوام کو صحت عامہ کی بہترین سہولیات فراہم کرنا حکومت کی اولین ترجیح ہے۔ انہوں نے صحت کے شعبے میں جاری اصلاحات کے عمل کو مزید تیز کرنے کی ہدایت کرتے ہوئے کہا کہ عوام کو معیاری طبی سہولیات کی فراہمی کے لیے تمام دستیاب وسائل بروئے کار لائے جائیں۔
مزید پڑھیں
وزیراعظم نے کہا کہ صحت کا شعبہ براہ راست عوام کی فلاح و بہبود سے منسلک ہے، اس لیے اس شعبے میں منصوبوں کی تکمیل میں غیر ضروری تاخیر برداشت نہیں کی جائے گی۔
پولی کلینک ایکسٹینشن کو جناح میڈیکل کمپلیکس کے پہلے فیز کے طور پر شروع کرنے کا فیصلہ
اجلاس میں اہم فیصلہ کیا گیا کہ سیکٹر جی 11 میں زیر تعمیر فیڈرل گورنمنٹ پولی کلینک ایکسٹینشن کو جناح میڈیکل کمپلیکس کے پہلے فیز کے طور پر شروع کیا جائے گا۔
حکام کے مطابق اس فیصلے کا مقصد منصوبے کو مکمل طور پر فعال ہونے میں لگنے والے طویل وقت کا انتظار کرنے کے بجائے پہلے مرحلے میں ہی شہریوں کو طبی سہولیات فراہم کرنا ہے۔
وزیراعظم نے ہدایت کی کہ پہلے فیز کو تیزی سے مکمل کرکے فعال کیا جائے تاکہ اسلام آباد اور گردونواح کے شہریوں کو جدید طبی سہولیات کی فراہمی ممکن بنائی جاسکے۔
پہلا فیز جدید اور اسٹیٹ آف دی آرٹ اسپتال بنایا جائے
وزیراعظم شہباز شریف نے متعلقہ حکام کو جناح میڈیکل کمپلیکس کے پہلے فیز کی تعمیر مارچ 2027 تک مکمل کرنے کی واضح ہدایت کردی۔
وزیراعظم نے کہا کہ منصوبے کی تکمیل کے لیے تمام ضروری اقدامات کیے جائیں اور تعمیراتی کام کی رفتار کو تیز کیا جائے۔ انہوں نے متعلقہ وزارتوں اور اداروں کو منصوبے کی بروقت تکمیل کے لیے باہمی رابطے کے ساتھ کام کرنے کی ہدایت بھی کی۔
وزیراعظم نے ہدایت کی کہ جناح میڈیکل کمپلیکس اینڈ ریسرچ سینٹر کے پہلے فیز کو جدید اور اسٹیٹ آف دی آرٹ اسپتال بنانے کے لیے ہر ممکن اقدامات کیے جائیں۔
انہوں نے کہا کہ منصوبے میں جدید تقاضوں کو مدنظر رکھتے ہوئے تعمیراتی معیار کو یقینی بنایا جائے اور اسپتال میں مریضوں کو علاج معالجے کی بہترین سہولیات فراہم کرنے کے لیے ضروری انفرااسٹرکچر تیار کیا جائے۔
ہائی ٹیک مشینری کی تنصیب یقینی بنانے کی ہدایت
وزیراعظم شہباز شریف نے اسپتال میں جدید اور ہائی ٹیک طبی مشینری کی تنصیب یقینی بنانے کی ہدایت کرتے ہوئے کہا کہ جدید طبی سہولیات کے بغیر کسی نئے اسپتال کو عالمی معیار کا قرار نہیں دیا جاسکتا۔
انہوں نے متعلقہ حکام کو ہدایت کی کہ مشینری اور طبی آلات کی ضروریات کا بروقت تعین کیا جائے تاکہ اسپتال مکمل ہونے کے بعد علاج معالجے کی سہولیات کی فراہمی میں تاخیر نہ ہو۔
وزیراعظم نے منصوبے میں معیار اور شفافیت کو یقینی بنانے کے لیے تھرڈ پارٹی ویلیڈیشن کا عمل منصوبے کی پیشرفت کے ساتھ ساتھ جاری رکھنے کی ہدایت کی۔
وزیراعظم محمد شہباز شریف کی زیر صدارت جناح میڈیکل کمپلیکس و ریسرچ سینٹر اور فیڈرل گورنمنٹ پولی کلینک فیز 2 ایکسٹینشن کی تعمیر کے حوالے سے جائزہ اجلاس آج اسلام آباد میں منعقد ہوا.
اجلاس میں گفتگو کرتے ہوئے وزیرِ اعظم نے کہا کہ عوام کو صحت عامہ کی سہولیات فراہم کرنا حکومت کی… pic.twitter.com/TSKdQhuFPd
— Prime Minister's Office (@PakPMO) September 3, 2026
انہوں نے کہا کہ تعمیراتی کام کے معیار، رفتار اور دیگر اہم مراحل کی آزادانہ جانچ پڑتال ضروری ہے تاکہ منصوبہ مقررہ معیار کے مطابق مکمل ہو اور سرکاری وسائل کا مؤثر استعمال یقینی بنایا جاسکے۔
صحت کے شعبے میں اصلاحات کا عمل تیز کیا جائے
وزیراعظم نے صحت کے شعبے میں اصلاحات کے عمل کو مزید تیز کرنے پر زور دیتے ہوئے کہا کہ حکومت کا مقصد عوام کو ایسی طبی سہولیات فراہم کرنا ہے جہاں جدید ٹیکنالوجی، معیاری علاج اور بہتر طبی خدمات ایک ہی جگہ دستیاب ہوں۔
انہوں نے متعلقہ حکام کو ہدایت کی کہ منصوبے سے متعلق تمام معاملات کو مقررہ مدت کے اندر مکمل کیا جائے اور تعمیراتی پیش رفت کی باقاعدگی سے نگرانی کی جائے۔
اجلاس میں وفاقی وزیر اقتصادی امور احد خان چیمہ، وفاقی وزیر قومی صحت سید مصطفیٰ کمال، وفاقی وزیر پاور ڈویژن سردار اویس احمد خان لغاری اور متعلقہ اعلیٰ سرکاری افسران نے شرکت کی۔
