اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے بارشوں اور بڑھتے درجہ حرارت کے باعث گلگت بلتستان، خیبرپختونخوا اور آزاد کشمیر کے مختلف علاقوں میں گلیشیائی جھیلیں پھٹنے سے ممکنہ سیلاب کا الرٹ جاری کر دیا ہے۔
این ڈی ایم اے الرٹ کے مطابق غذر، ہنزہ، نگر، شگر، گلگت، روندو، دیامر، استور، سکردو اور وادی نیلم کے علاقے حساس قرار دیئے گئے ہیں، جہاں گلیشیائی جھیلوں کے پھٹنے سے اچانک سیلاب کا خطرہ موجود ہے۔
این ڈی ایم اے نے چترال، دیر، سوات، شانگلہ، کوہستان اور مانسہرہ میں بھی سیلابی صورتحال اور لینڈ سلائیڈنگ کے خدشے سے خبردار کر دیا۔
سب سے زیادہ پڑھی جانے والی
دوسری جانب نیشنل ایمرجنسی آپریشنز سینٹر (این ای او سی) نے پوٹھوہار اور بالائی خیبرپختونخوا میں تیز بارشوں کا الرٹ جاری کر دیا۔ اسلام آباد، راولپنڈی، اٹک، چکوال، جہلم اور مری میں 2 سے 5 ستمبر کے دوران شدید بارش کا امکان ظاہر کیا گیا ہے۔
دیر، سوات، بونیر، ملاکنڈ، مانسہرہ، ایبٹ آباد، صوابی اور پشاور میں بھی شدید بارشوں کی پیشگوئی کی گئی ہے، جس کے باعث شہری علاقوں میں اچانک سیلاب جبکہ پہاڑی علاقوں میں لینڈ سلائیڈنگ کا خدشہ ہے۔
این ڈی ایم اے نے شہریوں کو گلیشیئرز سے آنے والے دریاؤں، ندی نالوں، نشیبی علاقوں اور خطرناک پہاڑی مقامات سے دور رہنے کی ہدایت کی ہے۔ ادارے نے عوام پر زور دیا ہے کہ موسم اور ممکنہ خطرات سے متعلق سرکاری ہدایات پر عمل کریں۔
