بالی ووڈ کے معروف اداکار، ہدایت کار اور پروڈیوسر سہیل خان نے پہلی بار انکشاف کیا ہے کہ وہ بچپن میں جنسی ہراسانی کا شکار ہوئے تھے، تاہم اس تکلیف دہ واقعے کو انہوں نے کئی برس تک چھپائے رکھا۔
بھارتی میڈیا کے مطابق سہیل خان نے یہ انکشاف ریئلٹی شو “الائنس” میں گفتگو کے دوران کیا۔ انہوں نے بتایا کہ بچپن میں پیش آنے والے اس واقعے کے بعد وہ طویل عرصے تک خاموش رہے اور شرمندگی و خوف کے باعث کسی کو کچھ نہ بتا سکے۔
دھرمیندر کی موت پر افسردہ سلمان خان کا جذباتی بیان سامنے آ گیا
سہیل خان نے کہا کہ وقت گزرنے کے بعد جب وہ بالغ ہوئے تو انہوں نے اپنے والد، معروف فلمی مصنف سلیم خان، کو اس واقعے سے آگاہ کرنے کا فیصلہ کیا۔
اداکار کے مطابق جب انہوں نے اپنے والد سے کہا، “ڈیڈی، میرے ساتھ یہ ہوا تھا”، تو سلیم خان یہ سن کر بے حد افسردہ ہوگئے۔ سہیل خان نے بتایا کہ ان کے والد کو اس بات کا زیادہ دکھ تھا کہ وہ اتنے برس تک یہ بوجھ تنہا اٹھائے رہے اور ان سے اس بارے میں بات نہ کر سکے۔
انہوں نے کہا کہ ایسے واقعات کے بعد متاثرہ افراد اکثر خود کو قصوروار سمجھنے لگتے ہیں، حالانکہ ان کا کوئی قصور نہیں ہوتا، لیکن شرمندگی اور خوف کے باعث وہ خاموش رہتے ہیں۔
خواہش ہے سلمان خان میری زندگی پر بننے والی فلم کریں، دھرمیندرا
سہیل خان کا کہنا تھا کہ اس تجربے نے انہیں ایک باپ کے طور پر بھی بدل کر رکھ دیا۔ انہوں نے بتایا کہ اب وہ اپنے بچوں کو ہمیشہ یہ تلقین کرتے ہیں کہ اگر اسکول یا کسی اور جگہ ان کے ساتھ بدسلوکی، ہراسانی، دھونس یا کوئی بھی ناخوشگوار واقعہ پیش آئے تو فوراً انہیں آگاہ کریں۔
ان کے بقول، وہ اپنے بچوں سے کہتے ہیں کہ کسی بھی معاملے کو دل میں نہ رکھیں بلکہ ہر بات بلا جھجھک والدین کے ساتھ شیئر کریں تاکہ بروقت مدد فراہم کی جا سکے۔
سلمان خان قانونی مشکل میں، گمراہ کن اشتہار پر عدالت کا نوٹس
سہیل خان نے یہ بھی کہا کہ ریئلٹی شو میں شرکت ان کے لیے ایک منفرد تجربہ تھا، جس نے انہیں نہ صرف اپنی شخصیت کے مختلف پہلوؤں سے روشناس کرایا بلکہ زندگی کے کئی نئے سبق بھی سکھائے۔
اداکار کے اس جذباتی اعتراف کو سوشل میڈیا پر بھی بڑی توجہ حاصل ہو رہی ہے۔ متعدد صارفین نے ان کی ہمت کو سراہتے ہوئے کہا کہ ایسے واقعات پر خاموشی توڑنا ضروری ہے تاکہ متاثرہ افراد کو حوصلہ ملے اور خاندانوں میں کھل کر بات کرنے کا رجحان فروغ پائے۔
