ستائیسویں آئینی ترمیم اور آئینی عدالت کے قیام کے خلاف دائر درخواست پر سندھ ہائیکورٹ نے وفاقی آئینی بینچ کے چیف جسٹس سمیت دیگر ججز کو نوٹس جاری کرنے کے نکتے پر فیصلہ محفوظ کرلیا ہے۔
درخواست میں مؤقف اختیار کیا گیا ہے کہ ستائیسویں آئینی ترمیم آئین کے بنیادی ڈھانچے سے متصادم ہے اور ترمیم کے ذریعے عدلیہ میں بنیادی نوعیت کی تبدیلیاں کی گئی ہیں۔ درخواست گزار کے مطابق آئینی عدالت کیلئے 6 ججز کو نامزد کرکے ان کی تقرری کے نوٹیفکیشن بھی جاری کردیئے گئے ہیں، جو آئین کے طے شدہ اصولوں کی خلاف ورزی ہے۔
درخواست میں مزید کہا گیا ہے کہ سپریم کورٹ، سندھ ہائیکورٹ بار ایسوسی ایشن کیس میں ججز کو فریق بنانے کی اجازت دے چکی ہے، اس لیے اس کیس میں بھی متعلقہ ججز کو نوٹس جاری کیا جانا ضروری ہے۔
درخواست میں وزارتِ قانون و انصاف، پارلیمانی امور، وفاقی آئینی عدالت کے چیف جسٹس اور دیگر کو فریق بنایا گیا ہے۔ عدالت نے تمام دلائل سننے کے بعد نوٹس جاری کرنے یا نہ کرنے سے متعلق فیصلہ محفوظ کرلیا۔
