اسلام آباد: افغان طالبان رجیم کی درخواست پر دونوں کی باہمی رضامندی سے عارضی طور پر سیز فائر کا فیصلہ کر لیا گیا۔
وزارت خارجہ کے مطابق افغان طالبان رجیم کی درخواست پر دونوں ممالک کی باہمی رضامندی سے اگلے 48 کے لیے عارضی طور پر سیز فائر کا فیصلہ کیا گیا ہے۔ سیز فائر کا فیصلہ آج شام 6 بجے سے کیا گیا ہے۔
اس دوران دونوں اطراف تعمیری بات چیت کے ذریعے اس پیچیدہ مگر قابل حل مسئلے کا مثبت حل تلاش کرنے کی مخلصانہ کوشش کی جائے گی۔
یہ بھی پڑھیں: صدر آصف زرداری سے فیلڈ مارشل عاصم منیر کی ملاقات، سیکیورٹی امور پر مشاورت
بدھ کو بھی افغان طالبان کی جارحیت کا منہ توڑ جواب دیا گیا۔ پاک فوج نے چمن سیکٹر میں مؤثر جوابی کارروائی کی جس کے نتیجے میں متعدد افغان طالبان ہلاک ہوئے۔
اسپن بولدک میں مارٹر اور ٹینکوں سے افغان طالبان کیخلاف کارروائی کی گئی۔ پاک فوج کی جانب سے افغان طالبان کی پوسٹوں کو کامیابی سے نشانہ بنایا گیا۔
سیکیورٹی ذرائع کا کہنا ہے کہ پاکستان نے صوبہ قندھار اور کابل میں Precision Strikes خالصتاً افغان طالبان اور خوارجین کے ٹھکانوں پر کیں۔ پاک فوج نے قندھار میں افغان طالبان بٹالین ہیڈکوارٹرنمبر 4، 8 بٹالین اور بارڈر بریگیڈ نمبر 5 کے اہداف کو نشانہ بنایا۔
یہ تمام اہداف باریک بینی سے منتخب کئے گئے جو شہری آبادی سے الگ تھلگ تھے اور کامیابی سے تباہ کئے گئے، کابل میں فتنہ الہندوستان کے مرکز اور لیڈرشپ کو نشانہ بنایا گیا ،پاک فوج کسی بھی جارحیت کا منہ توڑ جواب دینے کی بھرپور صلاحیت رکھتی ہے۔
