سابق گورنر سندھ اور متحدہ قومی موومنٹ (ایم کیو ایم) کے سابق رہنما ڈاکٹر عشرت العباد نے کہا ہے کہ ہم نئی سیاسی جماعت بنائیں گے۔
نجی ٹی وی چینل سے گفتگو کرتے ہوئے انہوں نے جلد پاکستان واپسی کا اعلان کردیا۔ انہوں نے کہا کہ اختلاف بالائے طاق رکھ کر نئی جماعت میں ایم کیو ایم پاکستان کو بھی شمولیت کی دعوت دیں گے۔
ڈاکٹر عشرت العباد کا کہنا تھا کہ موجودہ حکومت کے پاس وقت کم ہے، معیشت کی بہتری کے لیے کرپشن کے خلاف کڑا احتساب کرنا ہوگا۔ گورننس ناکام ہوجائے تو صورتحال کوئی بھی رخ اختیار کرسکتی ہے۔
شیر افضل مروت اور عشرت العباد کی دبئی میں ملاقات، روابط جاری رکھنے پر اتفاق
انہوں نے مزید کہا کہ سیاسی اور معاشی عدم استحکام خطرناک حد کو چھو رہا ہے، ملک میں امن و امان کی صورتحال ابتر ہے۔
خیال رہے کہ اس سے قبل اپنے ایک بیان میں سابق گورنر نے کہا تھا کہ ان حالات میں مزید چپ رہنا ممکن نہیں ہے۔ اس لیے مجبور ہو کے سیاست میں فعال ہونے کا فیصلہ کیا ہے۔
