وزیراعلیٰ پنجاب مریم نواز نے کہا ہے کہ چار ماہ ٹانگ پر پلستر باندھنے کے ڈرامے کے دوران 9 مئی کی منصوبہ بندی کی گئی۔
انہوں نے اپنے ایک بیان میں بانی پی ٹی آئی عمران خان کے بیان پر ردِعمل دیتے ہوئے کہا کہ بالآخر 9 مئی کے ماسٹر مائنڈ نے منصوبہ بندی کا اعترافِ گناہ کرلیا۔ یہ جماعت نہیں انتشاری ٹولہ ہے، انتشاری ٹولے کا مقصد صرف اور صرف شر پسندی کے ذریعے ریاست کو نقصان پہنچانا ہے۔
مریم نواز کا کہنا تھا کہ زمان پارک دہشت گردوں کا تربیتی ہیڈ کواٹر بنا رہا، زمان پارک سے پیٹرول بم بنانے اور ریاست پر حملے کی تربیت دی جاتی رہی۔ یہ کیسا پُرامن احتجاج تھا جس میں 200 سے زائد فوجی تنصیبات پر حملے ہوئے۔
وزیر اعلیٰ مریم نواز کا پنجاب کابینہ میں توسیع پر غور
لیگی رہنما نے کہا کہ ایئر فورس کے طیاروں کو آگ لگائی گئی، کور کمانڈر ہاؤس جلایا گیا اور شہدا کی یادگاروں کی توہین کی گئی۔ پاکستان کو ڈیفالٹ کرانے اور آئی ایم ایف کو خط لکھنا، اس بڑی سازش کا حصہ ہے۔
انہوں نے کہا کہ اس جماعت نے پولیس کے سر پھاڑے اور سپریم کورٹ کی دیواروں پر گندے کپڑے دھوئے۔ سائفر لہرانے کی سازشیں، شہداء کی یادگاروں کی بے حرمتی اس بڑی سازش کا حصہ ہیں۔
وزیراعلیٰ نے مزید کہا کہ شواہد اور ثبوتوں کی موجودگی میں آئین اور قانون پر عمل کیا جانا چاہیے۔ شرپسند اور انتشاری ٹولے کے خلاف سخت کارروائی ملکی سلامتی اور قومی مفادات کا تقاضا ہے۔
