تحریک انصاف کے سینیئر رہنما اور سابق اسپیکر قومی اسمبلی اسد قیصر نے کہا ہے کہ بانی پی ٹی آئی عمران خان کہہ چکے کہ فتح مکہ ماڈل پر جائیں گے۔
نجی ٹی وی چینل سے گفتگو کرتے ہوئے انہوں نے کہا کہ ہم آئین کی بالادستی اور قانون کی حکمرانی کے لیے اسمبلی اور عوام میں جدوجہد کریں گے۔ دھاندلی کے خلاف ہم سب دروازے کھٹکھٹائیں گے، ہمارے پاس اور کیا آپشن ہے۔
وزیراعظم شہباز شریف کی پیشکش پر شیر افضل مروت کا ردعمل آگیا
اسد قیصر کا کہنا تھا کہ لوگوں نے ووٹ پی ٹی آئی کو دیے اور وزیراعظم شہباز شریف بن گئے، اس پر ہم کیسے خاموش رہیں۔ بانی پی ٹی آئی عمران خان کسی سے انتقام لینے کا ارادہ نہیں رکھتے، وہ فتح مکہ ماڈل پر جائیں گے۔
سابق اسپیکر قومی اسمبلی نے کہا کہ سب سے پہلے ہم نے اس نظام کو تبدیل کرنا ہے۔ آئندہ حکومت ہماری ہوگی اور ہم ملک میں صاف و شفاف انتخابات کرائیں گے۔
انہوں نے مزید کہا کہ جمیعت علمائے اسلام (ف) کے سربراہ مولانا فضل الرحمان کے ساتھ ہمارے فاصلے طویل ہیں۔ انہیں وقت کے ساتھ کم کرنے کی کوشش کریں گے۔
