قومی اسمبلی کے حلقہ این اے 71 سیالکوٹ سے پاکستان تحریک انصاف کے رہنما عثمان ڈار کی والدہ کے کاغذات نامزدگی مسترد کر دیے گئے۔
عثمان ڈار کی والدہ ریحانہ امتیاز ڈار کے علاوہ عمر ڈار کی اہلیہ عروبا ڈار کے بھی کاغذات نامزدگی مسترد کردیے گئے ہیں۔
دونوں کے کاغذات نامزدگی سوشل سیکیورٹی واجبات کی عدم ادائیگی پر مسترد کیے گئے ہیں، اس حلقے میں ساس اور بہو نے مسلم لیگ ن کے رہنماء خواجہ آصف کے مقابلے میں کاغذات نامزدگی جمع کروائے تھے۔
واضح رہے کہ عام انتخابات کیلئے کاغذات نامزدگی کی جانچ پڑتال جاری ہے، لاہور کے حلقہ این اے 129سے سابق وفاقی وزیر حماد اظہر کے کاغذات نامزدگی پر اعتراض دائر کردیا گیا۔
نواز شریف عوام کیلئے نہیں اپنے کیس ختم کرنے کیلئے واپس آئے، پرویز خٹک
حماد اظہر کے خلاف اعتراض رانا عرفان ایڈووکیٹ نے دائر کیا ہے، اعتراض میں درخواست گزار نے موقف اپنایا کہ حماد اظہر مختلف مقدمات میں اشتہاری ملزم ہے، حماد اظہر پر دہشت گردی کے مقدمات بھی درج ہیں لہذا استدعا ہے کہ آر او کاغذات نامزدگی مسترد کرے۔
اس سے قبل پنجاب کے صوبائی حلقہ پی پی 171سے بھی سابق وفاقی وزیر و پاکستان تحریک انصاف کے رہنما حماد اظہر کے کاغذات نامزدگی پر اعتراض دائر کیا گیا تھا۔
ادھر پی پی 150سے صنم جاوید کے کاغذات نامزدگی پربھی اعتراض دائر کردیا گیا، اعتراض میں کہا گیا ہے کہ صنم جاوید کے کاغذات نامزدگی پر دستخط اصل نہیں، صنم جاوید پر دہشت گردی کے مقدمات درج ہیں۔
صنم جاوید کے والد نے اعتراض پر تحریری جواب جمع کرا دیا، جواب میں کہا گیا کہ صنم جاوید کے کاغذات نامزدگی ڈی سی سے اجازت لیکر دائر کیے، صنم جاوید کے کاغذات نامزدگی قانون کے مطابق ہیں آر او اعتراض مسترد کرے۔
