اسلام آباد: وزیرخارجہ مخدوم شاہ محمود قریشی امیر کویت کے لیے وزیراعظم عمران خان کا خصوصی خط لے کر روانہ ہو گئے ہیں۔
ہم نیوز کے مطابق اسلام آباد ایئر پورٹ پر اپنی روانگی سے قبل ذرائع ابلاغ سے بات چیت کرتے ہوئے شاہ محمود قریشی نے کہا کہ وہ دو روزہ دورے پر کویت جارہے ہیں۔ ان کا کہنا تھا کہ وہ امیر کویت کو وزیراعظم کا خصوصی خط دیں گے۔
وزیرخارجہ کے مطابق ان کی اپنے کویتی ہم منصب سے ون آن ون ملاقات ہوگی۔ ایک سوال کے جواب میں انہوں نے بتایا کہ کویتی وزیرخارجہ سے وفود کی سطح پر بھی مذاکرات ہوں گے۔
مخدوم شاہ محمود قریشی نے بتایا کہ ہونے والے مذاکرات میں کویت کے ساتھ ویزہ ایشوز سمیت دو طرفہ تعلقات پر بات چیت ہوگی۔
ہم نیوز کے مطابق وزیرخارجہ نے کہا کہ ان کا دورہ پاکستان اور کویت کے درمیان دو طرفہ تعلقات میں بہتری کے لیے معاون ثابت ہوگا۔
وزیرخارجہ مخدوم شاہ محمود قریشی دو روزہ دورے پر کویت روانگی کے لیے ایئرپورٹ پہنچے تو انہوں نے وی آئی پی راستے کے بجائے عام مسافروں کے لیے مختص راستے سے جانے کا انتخاب کیا۔
ہم نیوز کے مطابق وزیرخارجہ کو اپنے درمیان دیکھ کر ایئرپورٹ پہ موجود مسافروں نے اظہار مسرت کیا اور مخدوم شاہ محمود قریشی کے ہمراہ سیلفیاں بھی بنائیں۔
