اسلام آباد: جنوبی پنجاب کے مختلف علاقوں میں آج گرد آلود ہوائیں چلنے کا امکان ہے جبکہ ملک بھر کا موسم گرم رہے گا۔
محکمہ موسمیات کے مطابق منگل کو دوپہر کے بعد جنوبی پنجاب کے مختلف علاقوں میں گرد آلود ہوائیں چلیں گی جبکہ ملک کے بیشتر حصوں میں آج بھی موسم گرم اور خشک رہے گا۔
گزشتہ روز بھی ملک کے بیشتر حصوں میں موسم گرم اور خشک رہا جبکہ جنوبی پنجاب اور سندھ میں شدید گرمی تھی۔
پیر کو سب سے زیادہ گرمی سندھ کے اضلاع جیکب آباد 48 ڈگری سینٹی گریڈ، دادو 47 ڈگری سینٹی گریڈ، لاڑکانہ، شہید بے نظیر آباد 46 ڈگری سینٹی گریڈ، رحیم یار خان، بہاولنگر، سکھر، مٹھی اور موہنجو داڑو میں 45 ڈگری سینٹی گریڈ ریکارڈ کیا گیا۔
کراچی میں بھی گزشتہ روز سے گرمی کی شدت میں کمی آ گئی ہے جس پر شہریوں نے سکھ کا سانس لیا۔
سمندری ہوائیں چلنے سے کراچی کے شہریوں کو ہیٹ ویو سے چھٹکارا نصیب ہوا۔
یہ بھی پڑھیں محکمہ موسمیات نے کراچی کے لیے ہیٹ ویو الرٹ جاری کردیا
محکم موسمیات کے مطابق آئندہ 48 گھنٹے تک ملک بھر کا موسم گرم اور خشک رہے گا جبکہ ملک کے کسی بھی حصے میں بارش کا امکان نہیں ہے۔ رمضان المبارک میں کراچی ہیٹ ویو کا بھی کوئی خطرہ نہیں ہے۔
رمضان المبارک کے دوران کراچی میں سمندری ہوائیں بحال ہونے سے درجہ حرارت میں کمی آئے گی اس لیے ہیٹ ویو کا خطرہ نہیں ہے۔
واضح رہے گزشتہ دنوں کراچی میں شدید گرمی رہی جبکہ یکم مئی کو سال کا گرم ترین دن قرار دیا گیا تھا۔ چار روز قبل شہر قائد میں ہیٹ ویو کا زور برقرار تھا اور شہر کا درجہ حرارت 42 ڈگری سینٹی گریڈ ریکارڈ کیا گیا تھا۔
