وزیر دفاع خواجہ آصف نے واضح کیا ہے کہ تہران میں ہونے والی میٹنگ وزارت دفاع سے متعلق نہیں تھی، وہاں کوئی وزیر دفاع نہیں آیا اس لئے میری وہاں پر ضرورت ہی نہیں تھی۔
جمعیت علمائے اسلام (ف) کے سربراہ مولانا فضل الرحمان نے گزشتہ روز قومی اسمبلی میں خطاب کے دوران وزیر دفاع خواجہ آصف کی طرف اشارہ کرتے ہوئے کہا تھا کہ ’ دفاعی معاہدہ ایران میں ہو رہا ہے میٹنگ ہو رہی ہے لیکن وزیر دفاع اور وزیر خارجہ یہاں پاکستان میں بیٹھے ہوئے ہیں، کیا وہاں بھی وزارت داخلہ کی ڈیوٹی ہوتی ہے‘۔ دوران خطاب انہوں نے مسکراتے ہوئے وزیر دفاع کو دیکھا اور کہا کہ ”کوئی شرم ہوتی ہے کوئی حیا ہوتی ہے۔“ ان کی اس بات پر اسمبلی ہال قہقہوں سے گونج اٹھا تھا۔
واضح رہے کہ 26 اکتوبر کو مکہ دفاعی اتحاد کے رکن ممالک کے عہدیداروں کے درمیان ہونے والے اس اجلاس میں سعودی وزیرِ دفاع شہزادہ خالد بن سلمان، پاکستان کے چیف آف آرمی اسٹاف اور چیف آف ڈیفنس فورسز فیلڈ مارشل عاصم منیر، وزیر داخلہ محسن نقوی اور ترکیہ کے انٹیلی جنس چیف ابراہیم قالن نے شرکت کی۔ اجلاس تہران میں ہوا، جہاں ایرانی وزیرِ خارجہ عباس عراقچی اور سپریم نیشنل سکیورٹی کونسل کے سیکریٹری محسن رضائی بھی ان کے ساتھ شریک ہوئے تھے۔
خواجہ آصف نے آج قومی اسمبلی اجلاس میں اظہار خیال کرتے ہوئے کہا کہ گزشتہ روز موجودہ صورتحال اور حکومت کے طرز عمل کے زاویے پر مولانا فضل الرحمان نے تبصرہ کیا، میں چاہتا تھا ان کا جواب اسی طرح ایوان کے سامنے رکھوں۔
مولانا فضل الرحمان نے میرے لئے ’کنسرن شو‘ کیا ہے جس پر ان کا مشکور ہوں،انہوں نے اس ضمن میں اور بھی باتیں کیں کہ وسیع القلبی کا مظاہرہ کریں،ان کے والد بڑی عظیم شخصیت تھے مگریہ خود نورا کشتی کے تحت اپوزیشن لیڈر بنے۔
جناب خواجہ آصف صاحب بھی تشریف فرما ہیں۔ وزیرِ دفاع!
دفاعی معاہدہ ایران میں ہو رہا ہے، میٹنگ ہو رہی ہے، دفاعی وزیر یہاں بیٹھا ہوا ہے، خارجہ وزیر یہاں بیٹھا ہوا ہے۔ وہاں بھی وزارتِ داخلہ کی ڈیوٹی ہوتی ہے؟ اپنی عزت و مقام، کوئی شرم ہوتی ہے، کوئی حیا ہوتی ہے۔امیر جےیوآئی کا قومی اسمبلی میں خطاب
#مولاناکی_للکار
#عوام_کاسامناکرو
#سنسرڈ_پارلیمنٹ_نامنظور
#حلف_سےوفاداری_نبھاؤ
#جمھوریت_میں_زباں_بندی_کیوں— Jamiat Ulama-e-Islam Pakistan (@juipakofficial) October 28, 2026
وزیر دفاع نے کہا کہ تہران کے اندر کوئی دفاعی معاہدہ نہیں ہو رہا تھا، فیلڈ مارشل عاصم منیر نے سال سوا سال میں جنگ کی فتح کے بعد ایک کردار صلح کا ادا کیا ہے تاکہ خطے میں امن قائم ہو سکے،میں دفاع کے دونوں معاہدوں میں شامل تھا۔
آپ کا ماضی تضادات سے بھرا ہے اور یہ مجھ پر تنقید کررہے ہیں۔مجھے کہتے ہیں کہ ’کچھ شرم کرو، حیا کرو، آپ بھی کچھ شرم و حیا کریں‘۔
انہوں نے سوال اٹھایا کہ مولانا افغانستان جانے کی باتیں کررہے تھے وہ کون سے وزیر خارجہ تھے جو وہاں جارہے تھے؟وہ یہ صرف اپنی اہمیت کو بڑھانے کے لئے کررہے تھے ۔مولانا فضل الرحمان کے تمام سیاسی جماعتوں کے ساتھ اختلافات اور تعاون بھی رہا ہے،وہ تمام جماعتوں کے ساتھ اقتدار کا حصہ بھی رہے ہیں ۔
خواجہ آصف نے کہا کہ جب میں پنڈی کے حق میں بولتا ہوں تو مجھے میری ماضی کی تقریر کو یاد کرایا جاتا ہے، ماضی کی میری تقریر اس دور کے حساب سے بالکل صحیح تھی، میں واحد سیاستدان ہوں جس نے ماضی کے حوالے سے معذرت بھی کی ہے، ماضی میں وہ (فضل الرحمان) ایل ایف او کے حوالے سے کیا کہتے تھے وہ بھی میں بتاؤں گا، وہ ایل ایف او کے تحت بننے والی حکومت کا حصہ رہے ہیں۔
کشمیر کمیٹی کی چیئرمین شپ پر سوال اٹھاتے ہوئے انہوں نے کہا کہ مولانا فضل الرحمان 10 سال کشمیر کمیٹی کے بھی چیئرمین رہے، وہ بتائیں ان کا کشمیر کے ساتھ کیا واسطہ ہے، انہوں نے دس سال کشمیر کے لیے کیا کیا؟ انہوں نے فضل الرحمان پر الزام لگایا کہ یہ لوگ تو پاکستان کی آزادی کے خلاف تھے، ہم نے ان کو جو اعزازات دیے وہ غلط تھے۔
خواجہ آصف کی تقریر کے دوران اپوزیشن کی جانب سے شور شرابہ بھی کیا گیا، اس دوران انہوں نے کہا کہ میں کوئی ایسی بات نہیں کرنا چاہتا تھا جس سے صورتحال خراب ہو، کل ہم نے خاموشی کے ساتھ ان کی تقریر سنی ہے، انہوں نے ذاتی حملہ کیا مگر میں نے کل کچھ نہیں کہا۔
’مولانا کو دفاع کے لیے خواتین کی ضرورت پڑگئی ہے‘
اپوزیشن بینچوں سے خواتین کے شور شرابے پر خواجہ آصف نے کہا کہ مولانا کو دفاع کے لئے خواتین کی ضرورت پڑ گئی ہے، کوئی مرد مولانا صاحب کے دفاع کے لئے سامنے نہیں آرہا، مجھے معلوم ہے میری کیا اوقات ہے اور باقی لوگوں کی کیا ہے۔
خواجہ آصف نے انتباہ کیا کہ میری زبان نہ کھلوائیں،انہوں نے مذہب اور سیاست کو کمائی کا ذریعہ بنایا ہوا ہے، پی ڈی ایم حکومت میں انہوں نے جو کچھ کیا پھر سب بتا دوں گا۔
View this post on Instagram
انہون نے مزید کہا کہ ”یہ خواتین ابھی بھی چپ نہیں کر رہیں، کیا مولانا کے پاس کوئی مرد نہیں بچا وہ خواتین سے دفاع کروا رہے ہیں، میں آپ لوگوں کو گھر چھوڑ کر آؤں گا، یہ اپنی لیڈر کی عزت نہیں کروانا چاہتے۔“
اس موقع پر اپوزیشن رکن عالیہ کامران نے کورم کی نشاندہی کی مگر ایوان کا کورم پورا نکلا۔
خواجہ آصف کی تقریر کے بعد جے یو آئی(ف) کے ارکان نے مولانا عبد الغفور حیدری کو بات کا موقع دینے کا مطالبہ کیا لیکن ڈپٹی اسپیکر نے اسے مسترد کردیا اور کہا ’آپ کے کہنے پر ہاؤس نہیں چلے گا‘۔
ایجنڈا کے بعد موقع ملنے کا کہتے ہوئے انہوں نے بیرسٹر گوہر کو بات کا موقع دے دیا۔
شاید آج خواجہ صاحب کچھ زیادہ ہی بول گئے، بیرسٹر گوہر
چیئرمین پی ٹی آئی بیرسٹر گوہر نے اپنی تقریر کے آغاز میں خواجہ آصف کا ذکر کیا اور کہا کہ شاید آج خواجہ صاحب کچھ زیادہ ہی بول گئے۔
انہوں نے سابق وزیراعظم عمران خان کی بہن نورین نیازی سے متعلق کہا کہ ”خان صاحب کی بہن نورین نیازی کو رات کو اسپتال لے کر آئے تھے جو ہمارے لئے بہت سخت تشویش کی بات ہے۔“
انہوں نے مطالبہ کیا کہ جن ہمارے لوگوں کو تھری ایم پی او کے تحت رکھا گیا ہے ان کو رہا کیا جائے۔
بیرسٹر گوہر کا کہنا تھا کہ روایات کی پامالی ہوئی ہے تینوں بہنوں کو جیل میں رکھا گیا ہے، اگر یہ صورتحال رہی تو وفاق کو خطرے میں ڈالا جارہا ہے،جمہوریت کو خطرے میں ڈالا جارہا ہے۔
اپوزیشن کو اپنی ذمہ داری ادا کرنا پڑے گی، بلاول بھٹو
علاوہ ازیں قومی اسمبلی اجلاس سے خطاب کرتے ہوئے چیئرمین پاکستان پیپلز پارٹی بلاول بھٹو زرداری نے پاکستان تحریک انصاف (پی ٹی آئی) سمیت اپوزیشن جماعتوں کو پارلیمان کو کمزور کرنے کا ذمہ دار ٹھہرا دیا۔
ان کا کہنا تھا کہ ”اپوزیشن کو ذمہ داری اٹھانا ہوگی، ورنہ جو لوگ چاہتے ہیں کہ پارلیمان کمزور ہو اور عوام اس سے فائدہ نہ اٹھا سکیں، آپ کو مبارک ہو کہ ان مقصد پورا ہو چکا ہے۔“
انہوں نے اپوزیشن کو آڑے ہاتھوں لیتے ہوئے کہا کہ آپ نے کمیٹیوں میں اور ایوان میں نہ بیٹھنے کا فیصلہ کیا اور اپنی عوام کی آواز کو یہاں تک پہنچنے سے روکا۔
ان کا مزید کہنا تھا کہ ”عمران خان نے جو طاقت اور اتھارٹی قومی اسمبلی اور سینیٹ میں قائد حزب اختلاف کو دی ہے، وہ اس کا استعمال کرتے ہوئے اپنے ممبران کو ہدایت کریں کہ وہ پارلیمانی کارروائی میں اپنی شمولیت کو یقینی بنائیں۔“
بلاول بھٹو نے کہا کہ اگر الیکٹورل ریفارمز کمیٹی بنائے جانے کا فیصلہ ہوا ہے تو قائد حزب اختلاف سے درخواست ہے کہ وہ اس پر اپنا مؤقف دیں تاکہ ایوان کو وہ طاقت اور اختیار دلائے جا سکیں جس کا وہ حقدار ہے۔
چیئرمین پیپلز پارٹی نے کہا کہ پاکستان کوآنے والے دنوں میں جن مشکلات کا سامنا کرنا پڑ سکتا ہے،اس پر حکومتی وزرا اس ہاؤس کو پورے طریقے سے بریف کریں۔ اس ہاؤس کو بتائیں کہ مستقبل میں کن کن خطرات کا امکان ہے۔ہر ممبر کا حق ہے کہ ہم سنیں کہ پاکستان کون سے مسائل کا سامنا کر رہا ہے۔
ان کا کہنا تھا کہ دہشت گردی کی صورت میں اندرونی سطح پر ہمارے جو مسئلے ہیں اس کے بارے میں ہمیں بریف کیا جائے، بتایا جائے کہ کیا کیا جا رہا ہے؟
انہوں نے یہ بھی مطالبہ کیا کہ ایران کے معاملے سے پیدا ہونے والی صورتحال اور اس کے پاکستان پر اثرات پر بریف کیا جائے،اس کے علاوہ دفاعی معاہدوں پر بھی پارلیمان کو تفصیلی اعتماد میں لیا جائے۔
پی ٹی آئی کے رکن قومی اسمبلی علی محمد خان نے اپنے خطاب میں بلاول بھٹو کی تعریف کرتے ہوئے کہا کہ انہوں نے بہتر بات کی ہے، ہم بھی کہہ رہے ہیں کہ پارلیمنٹ کو مضبوط ہونا چاہیے۔
پارلیمان میں ایسی بلیک میلنگ ہو رہی ہے کہ بلیک میلر بھی شرما جائے، حنیف عباسی
وفاقی وزیر ریلوے حنیف عباسی نے قومی اسمبلی میں اظہار خیال کرتے ہوئے کہا کہ آج پاکستان کا دفاع مضبوط ہے، ملک میں تفریق پیدا کرنے والے خیر خواہ نہیں ہیں،ہم سب ایک ہیں، ہمیں متحد رہنا ہے،پارلیمان میں ایسی بلیک میلنگ ہو رہی ہے کہ بلیک میلر بھی شرما جائے۔
انہوں نے کہا کہ یہ پاکستان شہداء کا ہے، یہ پاکستان ان کا نہیں ہے جنھوں نے بنگلے بنا لیے اور بڑی بڑی گاڑیاں لے لیں، یہ پاکستان ان فوجی جوانوں کا ہے جو سرحد پر کھڑے ہیں۔ کیا ہمیں جیلوں میں نہیں ڈالا گیا تو کیا ہم عزت دینے والے پاکستان کو بھول جائیں، یہاں کبھی ہم پختون، سرائیکی، پنجابی اور بلوچ بن جاتے ہیں۔
حنیف عباسی نے مولانا فضل الرحمان پر سخت تنقید کرتے ہوئے کہا کہ جنہوں نے انہیں برا بھلا کہا، بعد میں یہ ان کے اپوزیشن لیڈر بن گئے۔ یہ حال مولانا صاحب کا ہے۔
ان کا کہنا تھا کہ کل مولانا نے انتہا ہی کر دی کہ آپ کے اور میرے شہید۔ آپ کے کون سے شہید ہیں؟ کیا آپ کو لگتا ہے کہ آپ کی تقاریر سے پاکستان ٹوٹ جائے گا ؟جو اٹھتا ہے کہتا ہے کشمیر جا رہا ہے کے پی جا رہا ہے بلوچستان جا رہا ہے، کسی مائی کا لال ایسا نہیں کر سکتا۔
وزیر ریلوے کا کہنا تھا کہ فوج میں بلوچ، پنجابی، پشتون ،سندھی سب شامل ہیں، خیبر پختونخوا میں دہشت گرد آج منہ چھپا رہا ہے اور بھاگ رہا ہے، خیبر پختونخوا کی پولیس کے جوانوں کو آپ کی سیاست کے لیے کیوں کٹوا دیں؟ مذہب کو اپنی سیاست کے لیے استعمال نہ کریں۔
انہوں نے کہا کہ آج پاکستان اس خطے کا محفوظ ملک ہے، پاکستان کے جھنڈے تلے سب کو اکٹھا ہونا چاہے، پاکستان میں تفریق کرنے والوں کو میں نہیں مانتا۔
حنیف عباسی خانہ بدوش ہیں جہاں گھاس پھوس ملے ادھر چلے جاتے ہیں، مولانا عبدالغفور حیدری
جے یو آئی (ف) کے رکن قومی اسمبلی مولانا عبدالغفور حیدری نے اپنی تقریر کے آغاز میں حنیف عباسی کو مخاطب کرتے ہوئے کہا کہ وہ خانہ بدوش ہیں، جہاں گھاس پھوس ملے ادھر چلے جاتے ہیں۔
انہوں نے کہا کہ خواجہ آصف جس کی لاٹھی اس کی بھینس کے کلیے پر چلتے ہیں، (ن) لیگ کی دو تہائی اکثریت تھی اور مارشل لا لگا، جے یو آئی(ف) نے اس کی مذمت کی تھی، ان لوگوں نے تو ایک قرارداد تک منظور نہیں کی ۔
ان کا کہنا تھا کہ اس مسلم لیگ (ن) کی کیا تاریخ ہے، ہم اور آپ پی ٹی آئی کو کہتے تھے کہ خان جہاں جاتا ہے وہاں آرمی چیف بھی ساتھ ہوتا ہے، اب شہباز شریف اگر ایسا کرے تو بہت اچھا لیڈر ہو گیا۔
انہوں نے کہا کہ ہم چاروں طرف سے حصار میں ہیں، چین سے اعتماد کا فقدان ہے، بھارت، ایران اور افغانستان کے ساتھ بارڈر بند ہیں، مولانا کو افغانستان آپ نے بھیجا آپ نااہل ہیں ان معاملات کو مزید نہیں چلا سکے ۔
عبدالغفور حیدری نے اسپیکر صاحب کو مخاطب کرتے ہوئے کہا کہ ”میری باتیں شاید آپ کو اچھی نہیں لگ رہیں، جیل میں سب کو جانا ہے شاید آپ کی باری بھی آ جائے۔“
انہوں نے عمران خان کے دور حکومت کا حوالہ دیتے ہوئے کہا کہ پی ڈی ایم میں جب ہم اکٹھے ہوئے تو ہم نے کہا کہ لانگ مارچ کرتے ہیں کچھ روز سڑک پر بیٹھتے ہیں، جس پر مسلم لیگ (ن) کے لوگوں نے کہا کہ ہمارے کارکنان سڑکوں والے نہیں ہیں۔
ان کا کہنا تھا کہ ہمارے لوگ پاکستان کی وجہ سے شہید ہو رہے ہیں،ہم نے فتویٰ دیا کہ ریاست کے خلاف بندوق اٹھانا جائز نہیں ہے،ہم پر حملے ہوئے اور اسی وجہ سے ہوئے، اگر ہم دہشتگردوں کے ساتھ ہیں تو پھر حملے آپ نے کروائے ہونگے،ان خانہ بدوشوں سے کہنا چاہتا ہوں کہ اپنے ماضی کی طرف دیکھو ۔مولانا صاحب کے تقریر کے نتیجے میں یہ خانہ بدوش اکٹھے کیے جاتے ہیں۔
ایف بی آرمیں اصلاحات تک ملکی معیشت بہتر نہیں ہو گی، قیصراحمد شیخ
مسلم لیگ (ن) کے رکن اسمبلی قیصر احمد شیخ نے کہا کہ چھوٹے اور درمیانی کاروباریوں پر زیادہ ٹیکس لگایا ہوا ہے جبکہ قرضوں کا صرف 6 فیصد ان کو ملتا ہے جبکہ باقی 94 فیصد بڑے کاروباریوں کو دیا جا رہا ہے۔
انہوں نے واضح کیا کہ جب تک فیڈرل بیورو آف ریوینیو (ایف بی آر) میں اصلاحات نہیں ہوں گی تب تک ملکی معیشت بہتر نہیں ہو گی۔ ایف بی آر میں رشوت خوری کا بازار گرم ہے جسے بند کیے بغیر کچھ بہتر نہیں ہو سکتا۔
تقریر کے دوران قیصر شیخ کا مائیک بند کر دیا گیا،جسے بعد ازاں کھولا گیا ،جس پر انہوں نے کہا کہ میں مسلم لیگ سے ہی ہوں ۔صرف لیڈروں کو ہی موقع دیا کریں ۔
ان کا کہنا تھا کہ کہا جا رہا ہے کہ ملک میں ترقی ہو رہی ہے جہاں 48 فیصد لوگ کرب میں ہیں، عذاب میں ہیں ،جو بھی پارٹی ہو ہمیں معیشت پر توجہ دینا ہوگی اور مہنگائی کا خاتمہ کرنا ہوگا۔
بعدازاں قومی اسمبلی کا اجلاس کل صبح 11 بجے تک ملتوی کردیا گیا۔



