چین کی وزارتِ خارجہ نے پریس بریفنگ کے دوران پاکستان اور چین کے مشترکہ مؤقف کا اظہار کرتے ہوئے امریکا اور ایران پر زور دیا کہ وہ مذاکرات بحال کریں، جنگ بندی سے متعلق مفاہمت پر عمل کریں اور خطے میں کشیدگی کم کرنے کے لیے سفارت کاری کو فروغ دیں۔
امریکی جارحیت جاری رہی تو جنگ کا دائرہ نئے محاذوں تک پھیل جائے گا، ترجمان ایرانی فوج
چینی وزارتِ خارجہ کے مطابق دونوں ممالک کا مؤقف ہے کہ کشیدگی میں کمی اور خطے میں امن و استحکام کے لیے سفارتی رابطوں کی بحالی ناگزیر ہے۔ تمام فریق جنگ بندی سے متعلق مفاہمتی یادداشت کی مکمل پاسداری کریں اور اپنے کیے گئے وعدوں کو پورا کریں۔
ترجمان نے مزید کہا کہ طاقت کے استعمال کے بجائے مذاکرات اور بات چیت ہی اختلافات کے حل کا مؤثر ذریعہ ہیں، اس لیے امریکا اور ایران کو تحمل کا مظاہرہ کرتے ہوئے سفارتی عمل کو آگے بڑھانا چاہیے۔
چینی وزارتِ خارجہ کے مطابق پاکستان اور چین خطے میں امن، استحکام اور کشیدگی میں کمی کے لیے تمام متعلقہ فریقوں کے ساتھ تعمیری کردار ادا کرنے کے خواہاں ہیں اور امید رکھتے ہیں کہ امریکا اور ایران اپنے وعدوں کی پاسداری کرتے ہوئے مذاکرات کی میز پر واپس آئیں گے۔
آبنائے ہرمز کشیدگی، امریکا نے ایران پر معاہدہ توڑنے کا الزام عائد کر دیا
یاد رہے امریکا کی جانب سے ایران پر آج مسلسل چھٹے روز بھی بمباری کی گئی ہے، ایرانی میڈیا رپورٹس کے مطابق بمباری کے نتیجے میں 7 افراد جاں بحق اور متعدد زخمی ہوئے۔
جواب میں پاسداران انقلاب نے بھی شام میں امریکی فوج کے اسپیشل آپریشنز کمانڈ سینٹر کو نشانہ بنانے اور متعدد امریکی فوجیوں کی ہلاکت کا دعویٰ کیا ہے۔
