کراچی: صوبائی الیکشن کمیشن کی جانب سے تصدیق شدہ نتائج کے مطابق سندھ اسمبلی میں پاکستان پیپلز پارٹی اب تک 71 نشستوں کے ساتھ سرفہرست ہے۔
الیکشن کمیشن نے سندھ اسمبلی کی 168 میں سے 118 حلقوں کے نتائج کا اعلان کردیا ہے جس کے مطابق پاکستان تحریک انصاف 20 نشستوں کے ساتھ دوسرے اور متحدہ قومی موومنٹ پاکستان (ایم کیو ایم) 12 نشستوں کے ساتھ تیسرے نمبر پر ہے۔
سندھ اسمبلی میں گرینڈ ڈیموکریٹک الائنس(جی ڈی اے) گیارہ اور متحدہ مجلس عمل(ایم ایم اے) اب تک ایک نشست حاصل کرنے میں کامیاب ہوئی ہیں جبکہ 50 حلقوں کے نتائج آنا باقی ہیں۔
سندھ اسمبلی کے 168 نشستوں میں سے 130 جنرل نشستیں ہیں جب کہ 29 نشستیں خواتین کے لیے اور نو نشستیں غیرمسلموں کے لیے مختص ہیں۔
سندھ میں پاکستان پیپلزپارٹی، پاکستان تحریک انصاف، پاکستان مسلم لیگ (ن)، متحدہ قومی موومنٹ پاکستان، پاکستان مسلم لیگ فنکشنل، گرینڈ ڈیموکریٹک لائنس اور پاک سرزمین پارٹی سمیت دیگر جماعتوں کے علاوہ آزاد امیدواروں نے بھی عام انتخابات میں حصہ لیا۔
