پاکستان نے سرحد پار دہشت گردوں کے خلاف مؤثر کارروائی کرتے ہوئے فتنہ الخوارج کے 26 دہشت گرد ہلاک اور ان کے 4 اہم مراکز تباہ کر دیے ہیں۔
وفاقی وزیر اطلاعات و نشریات عطا اللہ تارڑ نے ایکس پر جاری ایک بیان میں بتایا ہے کہ سیکیورٹی فورسز نے پاک افغان سرحد پر انٹیلیجنس معلومات کی بنیاد پر ایک مربوط اور منظم آپریشن کرتے ہوئے ‘فتنہ الخوارج’ کے ماسٹر مائنڈز اور منصوبہ سازوں کے ٹھکانوں کو نشانہ بنایا ہے، جس کے نتیجے میں بھارت کے زیرِ سرپرستی دہشتگرد سرگرمیوں میں ملوث 26 خارجی ہلاک کر دیے گئے۔
وفاقی وزیر کے مطابق یہ کارروائیاں موسیٰ درہ میں فرنٹیئر کانسٹیبلری (FC) کی چوکی، شمالی وزیرستان میں چیک پوسٹ اور بنوں پولیس اسٹیشن پر ہونے والے دہشت گردانہ حملوں کے ردِعمل کے طور پر کی گئیں۔
In the aftermath of recent terrorist incidents in Pakistan, including terrorist attack on Federal Constabulary Post in Musa Dara on 9 June 2026, Vehicle Borne Suicide Attacks on a Military Post in North Waziristan on 2 June 2026 and Police Station in Bannu on 9 May 2026, precise… pic.twitter.com/rY0PGC6YIu
— Attaullah Tarar (@TararAttaullah) June 10, 2026
آپریشن کے دوران دہشت گردوں کے 4 اہم اہداف، جن میں بدنام زمانہ دہشت گرد کمانڈر علیم خان اور کمانڈر اختر جانی خیل کے ٹریننگ سینٹرز (تربیتی مراکز) اور بھاری اسلحے کے گودام شامل ہیں، کو مکمل طور پر تباہ کر دیا گیا ہے۔
عطا تارڑ نے اپنے بیان میں عزم کا اعادہ کیا کہ ملک میں امن و استحکام کے قیام کے لیے ہر ممکن اقدام جاری رکھا جائے گا، کیونکہ شہریوں کی جان و مال کی حفاظت ریاست کی اولین ترجیح ہے۔
انہوں نے واضح کیا کہ ہماری سیکیورٹی فورسز اور قانون نافذ کرنے والے ادارے ملک سے دہشت گردی کے مکمل خاتمے کے لیے پوری طرح پرعزم ہیں۔
