پیپلزپارٹی کے چیئرمین بلاول بھٹو نے کہا ہے کہ فارم 45 کو آپ کامیاب کریں، فارم 47 کا بندوبست میں کروں گا۔
شگر میں انتخابی جلسے سے خطاب کرتے ہوئے چیئرمین پیپلز پارٹی بلاول بھٹو نے گلگت بلتستان کے عوام کا شکریہ ادا کرتے ہوئے کہا کہ خطے کے عوام تین نسلوں سے پیپلز پارٹی کا ساتھ دیتے آ رہے ہیں اور پارٹی کا گلگت بلتستان کے عوام کے ساتھ ایک مضبوط اور تاریخی رشتہ ہے۔
انہوں نے کہا کہ پیپلز پارٹی نے ہمیشہ عوامی حقوق، جمہوریت اور پسماندہ طبقات کی نمائندگی کے لیے جدوجہد کی ہے۔ ان کے بقول ذوالفقار علی بھٹو نے غریب عوام کی آواز بلند کی، متفقہ آئین دیا اور پاکستان کے ایٹمی پروگرام کی بنیاد رکھی، جبکہ بے نظیر بھٹو نے جمہوریت کی بحالی کے لیے تاریخی جدوجہد کی۔
بلاول بھٹو زرداری نے کہا کہ گلگت بلتستان کے عوام کی خدمت پیپلز پارٹی کا عزم ہے اور وہ ایک بار پھر عوامی حمایت حاصل کرنے کے لیے شگر آئے ہیں، انہوں نے دعویٰ کیا کہ گزشتہ انتخابات میں پیپلز پارٹی سے نو نشستیں چھینی گئیں، تاہم پارٹی نے محدود نمائندگی کے باوجود عوامی مسائل کے حل کے لیے کردار ادا کیا۔
بلاول بھٹو نے کہا کہ آپ نے الیکشن میں نکلنا ہے اور ووٹ دیکر فارم 45ساتھ لانا ہے ،کبھی یہ درخواست نہیں کی کہ فارم 47سے ہمیں حکومت دیں،فارم 45 کو آپ کامیاب کریں، فارم 47 کا بندوبست میں کروں گا، انہوں نے کہا کہ کسی سےکوئی حمایت نہیں مانگی نہ کبھی کہا سلیکٹ کیاجائے۔
انہوں نے کارکنوں پر زور دیا کہ انتخابات میں بھرپور حصہ لیں، ووٹ کا تحفظ کریں اور شفاف انتخابی عمل کو یقینی بنائیں۔ ان کا کہنا تھا کہ پیپلز پارٹی نے کبھی کسی غیر جمہوری حمایت یا “سلیکشن” کی خواہش نہیں کی بلکہ ہمیشہ عوامی مینڈیٹ پر یقین رکھا ہے۔
چیئرمین پیپلز پارٹی نے گلگت بلتستان کے لیے زیادہ خودمختاری کا مطالبہ کرتے ہوئے کہا کہ خطے کے فیصلے مقامی عوام کو خود کرنے چاہئیں، نہ کہ اسلام آباد میں بیٹھے بیوروکریٹس۔ انہوں نے وفاقی حکومت کو تنقید کا نشانہ بناتے ہوئے کہا کہ اگر وسائل اور فنڈز دستیاب نہیں تو متعلقہ وزارتوں کے کردار پر نظرثانی ہونی چاہیے۔
انہوں نے سندھ میں تھرکول منصوبے کو کامیاب ماڈل قرار دیتے ہوئے کہا کہ صوبے میں موجود کوئلے کے ذخائر قومی معیشت کے لیے انتہائی اہم ہیں اور ان سے پیدا ہونے والی بجلی ملک کے مختلف حصوں تک پہنچ رہی ہے۔
ترقیاتی بجٹ 8 سال سے جمود کاشکارہے، صوبوں کے پاس وسائل زیادہ اور وفاق کے پاس کم ہیں، احسن اقبال
علاقائی اور عالمی صورتحال پر بات کرتے ہوئے بلاول بھٹو زرداری نے جنگوں اور تنازعات کی مخالفت کا اعادہ کیا اور کہا کہ پیپلز پارٹی تاریخی طور پر امن کی حامی رہی ہے۔ انہوں نے ایران میں جانی نقصان اور بچوں کی ہلاکتوں پر افسوس کا اظہار کرتے ہوئے متاثرہ خاندانوں سے اظہارِ یکجہتی کیا۔
بلاول بھٹو نے کہا کہ پاکستان نے خطے میں امن کے فروغ اور کشیدگی میں کمی کے لیے مثبت کردار ادا کیا ہے اور امید ہے کہ امن کی کوششیں کامیاب ہوں گی۔ انہوں نے معاشی بحران سے نکلنے کے لیے قومی یکجہتی اور مشترکہ کاوشوں کی ضرورت پر بھی زور دیا۔
