وزیراعظم شہباز شریف نے کہا ہے کہ چین دنیا کے لیے قابل تقلیڈ ماڈل ہے، معاشی طاقت کے لحاظ سے چین کا کوئی ثانی نہیں۔
پاک چین سفارتی تعلقات کے 75 سال مکمل ہونے پر بیجنگ میں خصوصی تقریب ہوئی جس میں وزیراعظم شہباز شریف اور چینی نائب صدر ہین ژینگ نے شرکت کی اور یادگاری کیک کاٹا۔
وزیراعظم شہباز شریف نے کہا کہ چین نے گزشتہ 75 برس میں بے مثال ترقی کی، 2010 کے تباہ کن سیلاب میں چین نے پاکستان کی بھرپور مدد کی، صدر شی جن پنگ کی قیادت میں کروڑوں افراد غربت سے باہر آئے۔
انہوں نے کہا کہ خطے میں امن، ترقی اور خوشحالی کیلئے چین کی کوششیں قابل تحسین ہیں اور صدر شی جن پنگ تنازعات کے حل کیلئے مذاکرات پر یقین رکھتے ہیں۔
دوسری جانب وزیراعظم کے دورہ چین پر مشترکہ اعلامیہ جاری کر دیا گیا جس میں کہا گیا ہے کہ دونوں ملکوں میں اسٹریٹجک تعاون پرمبنی شراکت داری کو مزید فروغ دینے اور باہمی دلچسپی کے علاقائی و عالمی امور پر اتفاق کیا گیا۔
دونوں ملکوں نے 2025 تا 2029 ایکشن پلان کے تحت تعاون کو وسعت دینے، باہمی اعتماد،عملی، دفاعی و سکیورٹی تعاون اورعالمی وعلاقائی امور پر قریبی رابطےجاری رکھنے پر بھی اتفاق کیا۔
